पत्रकार विनय कुमार यादवको घटनाका आरोपितहरुलाई पक्राउ पूर्जी जारी, तीनै जना भगौडामा

न्यूज ब्यूरो, जनकपुरधाम । न्यूज ब्यूरोका स्वर्गीय पत्रकार विनय कुमार यादवको घटनामा आरोपितहरुमाथि पक्राउ पूर्जी जारी गरिएको छ ।

ईलाका प्रहरी कार्यालय ढल्केवरको अनुसन्धान छानबिनमा रहेको पत्रकार यादवको मुद्दामा जाहेरी परेपछि आरोपितहरु गाउँ छाडेर भगौडा भएका छन् ।

स्वर्गीय पत्रकार यादवकी आमा कान्ती देवी यादवले दिएको जाहेरीमा धनुषाधाम नगरपालिका वडा नम्बर ५ नौसयविघा बस्ने स्थानीय सुशिल यादव, उनका छोरा धीरेन्द्र यादव र बीरेन्द्र यादव गाउँ छाडेर भगौडा भएका छन् । उनीहरुमाथि प्रहरीले पक्राउ पूर्जी जारी गरी खोतलास गरिरहेको छ ।

पत्रकार यादवको घटना शंकास्पद देखिएको पुष्टि भएपछि जिल्ला प्रहरी कार्यालय धनुषाले उनीहरुमाथि कर्तव्य ज्यानको जाहेरी दायर गरेको हो । पक्राउ परेका मोटरसाईकल चालक एवम् मुख्य आरोपित ललन भन्ने लक्ष्मीनारायण यादवमाथि अनुसन्धान गहिरो बनाएपछि उनीहरुमाथि पक्राउ पूर्जी जारी गरिएको हो । यादवलाई ईलाका प्रहरी कार्यालय ढल्केवरमै राखेर अनुसन्धान जारी राखिएको हो ।

ईलाका प्रहरी कार्यालय ढल्केवरले उनीहरुमाथि पक्राउ पूर्जी जारी भएको र उनीहरु अहिले भागेको पुष्टि गरेको हो । प्रहरीका अनुसार, भगौडामा रहेका तीनै जनाको स्थिति समेत जानकारी लिसकेको र चाँडै पक्राउ गरी जिल्ला प्रहरी कार्यालय धनुषा ल्याउने जनाएको हो ।

गत बैशाख ११ गते पत्रकार यादवको ढल्केवर जनकपुरधाम सडकखण्डमा शंकास्पद मृत्यू भएको थियो । एक श्रोतका अनुसार, पत्रकार यादवको पोष्टमार्टममा सरिक भएका एक चिकित्सकका अनुसार उनको शरिरको प्रकृतिमा भिसेरा गर्दा रिढको हड्डी भाँचिएको, खाना नली ब्लोक भएको, फोक्सोमा जहरिला पदार्थ देखिएको हो । यद्यपी, यसको अधिकारिक पुष्टि भने पोष्टमार्टम रिपोर्टमै हुने बताइएको छ ।

घटना शंकास्पद देखिएपछि प्रहरीले जाहेरी दर्ता गरी अदालत चढाउने तरखरमा रहेको छ । तीनै जना पक्राउ परेपछि उनको घटनामा थप व्यक्तिहरुको सँलग्नता हुन सक्ने बुझिएको छ ।