मधेश सरकारबाट माओवादी बाहिरिए, मुख्यमन्त्री यादवको पद धरापमा

न्यूज ब्यूरो, जनकपुरधाम । जसपा नेपाल नेतृत्वको मधेश सरकारबाट माओवादी केन्द्र बाहिरिएको छ । आईतबार मधेश सरकारका मुख्यमन्त्रीलाई राजीनामा दिँदै माओवादीका मन्त्रीहरुले सरकारबाट बाहिर भएको जनाएको छ ।

मन्त्रीहरु भरतकुमार साह र युवराज भट्टराईले मुख्यमन्त्री सरोजकुमार यादवलाई भेटेर राजीनामा दिएका हुन् ।

साहलाई मुख्यमन्त्रीले वन तथा वातावरण मन्त्रालयको जिम्मेवारी तोके पनि उनले सम्हाल्न मानेका थिएनन् । भट्टराई भने उद्योग तथा पर्यटनमन्त्री थिए ।

मधेश सरकारबाट माओवादी बाहिरिएपछि अहिले जसपा नेपाल नेतृत्वको मुख्यमन्त्री सरोजकुमार यादव अल्पमतमा परेका छन् ।

यस अघि संकटका बिच बिश्वासको मत लिने क्रममा मुख्यमन्त्री यादव साहलाई रोजेको मन्त्रालय दिने सहमती गरेर पछि वन मन्त्रीमा सिमित गर्न खोजेपछि साह आक्रोसित भएका थिए । उनले बन मन्त्रालयमा पदभार ग्रहण अस्वीकार मात्र गरेनन् सरकारनै ढाल्ने तयारी थाले ।

साहले अर्थ मन्त्रालय ताकेको बताइन्छ । प्रधामन्त्री प्रचण्डकै रोहबरमा मुख्यमन्त्री यादवले माओवादीलाई रोजेको मन्त्रालय दिने सहमती गरेको बताइन्छ ।