माओवादी छाडेका नेता शर्मा आज जसपामा प्रवेश गर्दै

न्यूज ब्यूरो, जनकपुरधाम । माओवादी केन्द्रबाट अलग भएका नेता एवं पूर्व संविधान सभासद रामकुमार शर्मा आइतवार जनता समाजवादी पार्टी (जसपा) मा प्रवेश गर्न लागेका छन् ।

माओवादीमा काम गर्ने अवसर प्राप्त नभएको बताउँदै पार्टी परित्याग गरेका शर्मालाई जसपामा भित्र्याउन उपप्रधान एवं स्वास्थ्य तथा जनसंख्या मन्त्री समेत रहेका अध्यक्ष उपेन्द्र यादव शनिवार जनकपुरधाम आएका छन् ।

जसपाका राजनीतिक समिति सदस्य समेत रहेका पूर्व मन्त्री हरिनारायण यादवले महाधिवेशन तयारीको विषयमा दिनभरि नै बैठक भएको बताएका छन् ।आइतवार महोत्तरी जिल्ला समन्वय समितिको सभाकक्षमा मध्यान्ह सवा १२ बजे शर्माको नेतृत्वमा माओवादी केन्द्रिय सदस्य इन्दू शर्मा लगायतका नेताहरु प्रवेश गर्ने कार्यक्रम रहेको उनले बताएका छन् । शर्मा दम्पत्ती सांसद रहिसकेका छन् ।

महोत्तरी जिल्लाको निर्वाचन क्षेत्र नम्बर ३ बाट राजनीति गर्ने शर्माको प्रवेशले जसपा सुदृढ हुने बताइएको छ ।

शर्मा यसअघि पनि उपेन्द्र यादव नेतृत्वको तत्कालीन मधेशी जनाधिकार फोरमको महासचिव थिए । माओवादी छाडेर त्यतिबेला उनी फोरमको महासचिव बनेका थिए । पछि उनी माओवादीमा फर्किएका थिए । अहिले उनी फेरि उपेन्द्र् यादव नेतृत्वको जसपामा जाने तयारीमा लागेका हुन् । शर्मा गौर काण्डमा मुछिएका नेतासमेत हुन् ।

मधेशी नेता भए पनि उनी कर्णालीको सुर्खेतमा बस्दै आएका छन् । तर, उनी माओवादीमा मधेशबाटै राजनीति गर्न चाहन्थे । तर, उनले यहाँ मौका नपाएपछि अन्त्यमा जसपामा जान तयार भएका हुन् ।