कमला नदीको पूल आफ्नै कार्यकालमा सम्पन्न गर्छौः मन्त्री महासेठ

न्यूज ब्यूरो, जनकपुरधाम । भौतिक पूर्वाधार तथा यातायात मन्त्री रघुवीर महासेठले बहुप्रतिक्षित कमला नदीको पूल आफ्नै कार्यकालमा सम्पन्न गर्ने बताएका छन् ।

विहिबार गृह जिल्ला धनुषा आउँदा जनकपुरधाम विमानस्थलमा सँचारकर्मीहरुसँग कुराकानी गर्दै मन्त्री महासेठले चार बर्षपछि एमालेबाट भौतिक पूर्वाधार मन्त्रीको जिम्मेवारी पाएको भन्दै आफ्नै कार्यकालमा विभिन्न पूलहरु र अन्य निर्माणहरु सम्पन्न गर्ने बताए ।

नेपाल सरकारका उपप्रधानमन्त्री समेत रहेका मन्त्री महासेठले आफ्नो गृह जिल्ला धनुषामा अधुरा रहेका सडक, पुल पुलेसा र अन्य विकास निर्माणका काम आफ्नै कार्यकालमा सम्पन्न गर्ने उनले प्रतिबद्धता व्यक्त गरे ।

सरकारले पूर्वाधारलाई प्राथमिकतामा राखेकाले देशैभरि काम जनताले देखिनेगरि हुने बताए । एमाले—कांग्रेसबीच सहकार्यका विषयमा उनले भने,–‘वर्तमान सरकारले बाँकी अवधिसम्म सहकार्य गर्ने र प्रतिपक्षमा रहेको नेपाली कांग्रेससँग पनि सहकार्यको भावनाका साथ अगाडि बढ्ने छ ।’ यो सरकार बाँकी अवधिसम्म चल्छ ’ नेता महासेठले भने–‘प्रमुख प्रतिपक्षी भन्नुको अर्थ कांग्रेस ‘वेटिङ गभर्मेन्ट’ समेत भएकाले उसँग प्रतिपक्षमा होस् वा सरकारमा जहाँ भए पनि सहकार्य त हुन्छ नै, जो अहिले भइरहेको छ ।’ ‘गृहमन्त्री रवि लामिछानेका विषयमा कांग्रेसले उठाएको प्रश्न आफ्नो कित्तामा नउभिएपछिको आक्रोश हो’ उनले भने, यो विषय छलफल र अनुसन्धानकै अवस्थामा रहेकाले दोषी देखिए कोही पनि सरकारमा बस्न सक्दैनन् ।

देश विकासलाई प्राथमिकतामा राखेर नै गठबन्धन भएको बताउँदै उनले दोस्रो पटक उपप्रधानमन्त्री बनेका महासेठ पहिलो पटक बिहीवार गृहनगर जनकपुरधाममा आइपुग्दा उनलाई विमानस्थलमा कार्यकर्ताहरुले स्वागत गरेका थिए ।