अतिक्रमण गरिएको सार्वजनिक जग्गा खाली गरौँ, पक्की घर भएपनि भत्काएर खाली हुन्छः सिडिओ पाण्डे

न्यूज ब्यूरो, जनकपुरधाम । धनुषाको विभिन्न गाउँ, शहरमा अतिक्रमण गरिएको सार्वजनिक जग्गा वा सरकारी जग्गाको बारेमा जानकारी दिन जिल्ला प्रशासन कार्यालय धनुषाले अनुरोध छ ।

विभिन्न गाउँ टोलमा अतिक्रमण गरिएको सार्वजनिक जग्गा खाली गर्न सूचना जारी गर्दै त्यस्ता जग्गाहरुको बारेमा जानकारी गराउन निर्देशन दिएको हो ।

धनुषाका प्रमुख जिल्ला अधिकारी चक्रपाणी पाण्डेले सरकारी, गुठी संस्थान लगायतका सार्वजनिक जग्गा अतिक्रमण गरी भोगचलन गर्दै आएकाहरुलाई खाली गर्न निर्देशन जारी गरेको हो ।

सार्वजनिक जग्गाको दुरुपयोग र बिक्री–वितरण गर्ने, धितो बन्धक राख्ने लगायतको पाइएमा कानुन बमोजिम कारबाही गरिने जारी सूचनामा उल्लेख छ ।

जिल्लाभरिमा रहेका सरकारी, ऐलानी, पर्ती, मठमन्दिर लगायतका सार्वजनिक जग्गा अतिक्रमण गरी निजी प्रयोजनमा ल्याएका व्यक्तिमाथि १० दिनभित्र जानकारी गराउन समेत जिल्ला प्रशासनले सबैमा अनुरोध गरेको छ ।

धनुषा जिल्लाको विभिन्न गाउँ टोलमा सयौँ विघा सार्वजनिक सम्पति हडपिएको छ । सार्वजनिक जग्गा हडपिएर घर समेत बनाएपनि घर भत्काउने प्रशासनले जनाएको हो ।

न्यूज ब्यूरोसँगको कुराकानीमा सिडिओ पाण्डले घर बन्दै गरेको वा बनाईएको अवस्थामा समेत लागत तयार गरी निराकरण गर्ने बताए । उनले विभिन्न स्थानबाट ईमेल मार्फत समेत जानकारी धमाधम आउन थालेको बताउँदै कित्ता नम्बर थाहा नभएपनि चौतर्फीमा वडा नम्बर र सँकेत गरी निवेदन गर्न सकिने बताए ।