'झोलुँगे पुल सँचालन हुँदा जनकनन्दिनीका नागरिक सदैवको लागि लाभान्वित भयौँ'

न्यूज ब्यूरो, जनकपुरधाम । सिरहा र धनुषा जोड्ने गरी कमला नदीमा निर्माण भएको झोलुंगे पुल सञ्चालनमा आएपछि जनकनन्दिनीवासी लाभान्वित भएको बताईएको छ ।

धनुषाको जनकनन्दिनी गाउँपालिका वडा नम्बर ६ कठाल र सिराहा नगरपालिका वडा नम्बर १३ मल्हनिया जोड्ने गरी निर्माण भएको पुलको शनिबार प्रधानमन्त्री पुष्पकमल दाहाल प्रचण्डले उद्घाटन गर्न पुगेका बेला सम्मान गर्दै गाउँपालिका अध्यक्ष दिपिन देव यादव र उपाध्यक्ष कमला सहगलले सरकारप्रति कृतज्ञा प्रकट गरे ।

देशकै लामो झोलुँगे पूल दाबी गरिएको एक हजार पाँच सय दशमलव ४४ मिटर लम्बाइ र १.२ मिटर चौडाइ रहेको यो पुलबाट मोटरसाईकल समेत सँचालन हुने गरी बनाईएको हो । कमला नदीमा आउने बर्षेनी बाढी, निरन्तर पानी बहाबले वैकल्पिक बाटो खोज्नुभन्दा मोटरसाईकलसम्मको यात्रा सहज हुने भएपछि जनकनन्दिनीका जनप्रतिनीधिहरुले प्रधानमन्त्रीप्रति धन्यवाद ज्ञापन गरे ।

शनिबार कठाल पुगेका प्रधानमन्त्री प्रचण्डलाई गाउँपालिका अध्यक्ष यादव र उपाध्यक्ष सहगलले सँयुक्त रुपमा जानकी मन्दिर कोटेड मायाको चिनो प्रदान गर्दै यहाँका वासिन्दाको लागि लाभ दिएको भन्दै मँचमै धन्यवाद ज्ञापन गरे ।

संघीय सरकारको सस्पेन्सन ब्रिज डिभिजनको २८ करोड रुपैयाँ लागतमा थानी निर्माण सेवा काठमाडौंले यो निर्माणको ठेक्का लिएको थियो । १ असोज ०७९ देखि निर्माण सुरु गरिएको पुल निर्माण ठेक्का अवधिभन्दा ६ महिना अगावै सकिएको हो । पूलको भारवहन क्षमता ५४० मेट्रिक टन (करिब ३,८८६ पदयात्री) छ ।

पुल सञ्चालनमा आएसँगै धनुषाको पूर्वी भेगसहित प्रदेशको राजधानी जनकपुर र सिरहाका विभिन्न ठाउँमा आवत–जावत गर्न सहज भएको छ ।