महोत्तरीमा कलश यात्रा निकाल्दा दुई समुदायबीच झडप, कैयौँ घाईते

न्यूज ब्यूरो, जलेश्वर । महोत्तरीमा हिन्दु धर्मावलम्बीहरुले निकालेको कलश यात्राको क्रममा दुई समुदायबीच झडप भएको छ ।

सम्सी गाउँपालिका वडा नम्बर २ परसामा महावीर झण्डाको कलश यात्राका क्रममा दुई समुदायबीच झडप भएको हो ।

झडपका क्रममा ३ जना सामान्य घाइते भएका छन् ।घाइते हुनेमा मुस्लिम समुदाय तर्फबाट अस्मिता खातुन,गुलशान खातुन,इजराईल नदाफ घाइते भएको जनाएको छ।

सोही झडपमा परी हिन्दु समुदायबाट आधा दर्जन बढी युवक र महिला घाईते भएको बताईएको छ । मुस्लिम समुदायको तर्फबाट फालिएको पत्थर र प्रहार लाठीले कति जनाको टाउको फुटाएको हो भने मुक्का प्रहारले समेत घाईते भएको हो ।

सम्सी गाउँपालिका १ बाट सुरु भएको कलश यात्रा वडा नम्बर २ स्थित नुरी मस्जिद नजिक पुगेपछि झडप भएको हो ।

झडप नियन्त्रणका लागि प्रहरीले ४ राउन्ड हवाइ फायर गरेको जिल्ला प्रहरी कार्यालय महोत्तरीले जनाएको छ ।

हिन्दु समुदायले निकालेको कलशयात्राका क्रममा मस्जिदमा ढुंगा प्रहार भएको मुसलमान समुदायको दाबी छ । कलश यात्राका आयोजकहरुले भने मस्जिदमा ढुंगा प्रहार नभएको दाबी गरेका छन् ।

घटना स्थलमा अहिले व्यापक सुरक्षाकर्मीहरू परिचालन गरिएको छ। सुरक्षाकर्मीहरूले स्थितिलाई नियन्त्रणमा लिएको छ।