तेस्रो जनआन्दोलनका लागि जनकपुरमा जनमतको जनजागरण अभियान

न्यूज ब्यूरो, जनकपुरधाम । डा. सिके राउत नेतृत्वको जनमत पार्टीले गणतन्त्र दिवसका दिन गर्ने भनिएको शक्ति प्रदर्शनको लागि जनजारण अभियानलाई तीव्रता दिएको छ ।

जेठ १५ गते मनाइने ‘गणतन्त्र दिवस’ का दिन जनमत पार्टीले नौलो गणतन्त्र र लोकतन्त्रका लागि मधेश प्रदेशको राजधानी जनकपुरधाममा जनजारण अभियान चलाएको हो ।

जनमतका राष्ट्रिय उपाध्यक्ष ई. बसन्त कुशवाहाको नेतृत्वमा जनमतका नेता कार्यकर्ताहरुले हात हातमा पर्चा लिएर जेठ १५ को लागि शक्ति आर्जन गर्न घरदैलो सुरु गरेका छन् । काठमान्डौँमा नौलो गणतन्त्र र लोकतन्त्रका लागि गरिने आन्दोलनको लागि किन र केको लागि आन्दोलन भन्दै पर्चा मार्फत बुझाउन सुरु गरेका छन् ।

जनमतका अध्यक्ष सिके राउतको नेतृत्वमा काठमाडौँको भृकुटी मण्डपमा प्रदर्शनसहित आमसभाका आयोजना हुने प्रदर्शनको लागि जनकपुरवासीलाई एजेन्डाबारे बुझाउने अभियान सुरु गरेको उपाध्यक्ष कुशवाहाले जानकारी दिए ।

‘उठौँ, जागौँ–देश विकासको आन्दोलनमा सहभागी होऔँ, दोस्रो गणतन्त्रको आन्दोलनमा सहभागी होऔँ’ भ्रष्टाचार मेटाऔँ, दलतन्त्रको तानाशाही हटाऔँ, जनताको अधिकार जनताकै हातमा दिऔँ’ प्रत्यक्ष निर्वाचित प्रधानमन्त्रीसहित “नौलो गणतन्त्र र सामाजिक लोकतन्त्र” ल्याऔँ’ भनी नाराका साथ आयोजना हुने आमसभाको लागि जनजागरण अभियान चलाएको हो । जनमतले जेठ १५ गते ९ बुँदे माग राख्दै तेस्रो जनआन्दोलनको घोषणा गर्ने तयारी रहेको छ ।

‘अहिलेसम्म अरू नेता र पार्टीका लागि धेरै पटक आन्दोलन गर्‍यौँ, अब आफ्नो र आफ्नो सन्ततिको भविष्यको लागि देश विकास आन्दोलनमा सहभागी होऔँ ।’ भन्दै जनजागरण अभियान सुरु गरेको हो ।