जनमत पार्टी मधेश सरकारको प्रतिपक्षमा उभिएपछि मुख्यमन्त्री यादवलाई टेन्सन

न्यूज ब्यूरो, जनकपुरधाम । साईकल खरिदमा भ्रष्टाचार प्रकरणदेखि विभिन्न भ्रष्टाचारको काण्डमा मुछिएको मधेश प्रदेश सरकारको प्रतिपक्षमा जनमत पार्टी गएपछि वर्तमान सरकारलाई टेन्सन उत्पन्न भएको छ ।

यसअघि प्रतिपक्षविहिन रहेको मधेश प्रदेश सरकारलाई पटक पटक जनमत पार्टीले घचघचाउँदै आएको थियो । विश्वासको मत लिने बेलामा मुख्यमन्त्री यादवलाई समर्थन जनाएको जनमत पार्टीले मँगलबार समर्थन फिर्ता लिँदै प्रतिपक्षको भूमिकामा गएको हो ।

मधेश प्रदेशसभामा नैतिक समर्थन जनाएपनि जनमत पार्टीले मात्र सरकारको अनियमितता, गैर राजनीतिक गतिविधिमाथि प्रश्न तेर्साउँदै आवाज उठाउँदै आएको थियो ।

सोमबार राजविराजमा कृषि विश्वविद्यालय भवनको शिलान्यास कार्यक्रमलाई लिएर जनता समाजवादी पार्टी (जसपा) नेपाल र जनमत पार्टीबीच भएको नैतिक भिडन्तपछि मुख्यमन्त्री सरोजकुमार यादवलाई तनाव भएको हो । सरकारमै रहेर पनि सरकारको विरोध जनाउने एक मात्र जनमत पार्टीले पूर्ण प्रतिपक्षमै गएपछि वर्तमान सरकारले जनहितमा कार्य नगरे जनमतले लगाम लगाउने भएको छ ।

मुख्यमन्त्री यादवले जनमत पार्टी सरकारबाट बाहिर निस्केपछि अन्य पाँच दलका नेताहरु खुसी भएको सुनाएपनि उनले आफैँ नेतृत्व गरिरहेको वर्तमान सरकारलाई थप जटिलता उत्पन्न भएको हो । मधेश प्रदेश सरकारको काम कारवाही, विकास निर्माणका कार्यहरु सँचालन नहुँदै जनमत बाहिरिएपछि थप जटिलता उत्पन्न हुने सँकेत देखिएको हो ।

जनमत पार्टीबाट शिक्षामन्त्री बनेका महेश प्रसाद यादव र श्रम तथा रोजगार मन्त्री चन्दन कुमार सिँहले राजीनामा ठोकेका हुन् । उनीहरुको राजीनामासँगै मधेश सरकारको अँङक गणितमा रतिभर फरकको साथै कडा प्रतिपक्ष समेत पाएको हो ।