जनमतका मन्त्री यादवलाई टाउको फोड्दै जसपाका अध्यक्ष यादवले गरे कृषि विश्वविद्यालयको शिलान्यास

न्यूज ब्यूरो, जनकपुधाम । मधेश प्रदेशको सप्तरी राजविराजस्थित जनता समाजवादी पार्टी (जसपा) नेपालका अध्यक्ष उपेन्द्र यादवले कृषि विश्वविद्यालयको भवन शिलान्यास गरेका छन् ।

सोमबार शिलान्यास रोक्न राजविराज पुगेका मधेश प्रदेशका शिक्षामन्त्री महेश प्रसाद यादवलाई प्रहरीले टाउको फोडेको हो । शिलान्यास गर्ने क्रममा परिचालन गरिएको सुरक्षाकर्मीले यादवले अवरोध गर्न खोजेपछि टाउको फुटाएको हो । सोही झडपबीच अध्यक्ष यादवले शिलान्यास गरेका हुन् ।

आज (सोमबार) जनमत पार्टी र प्रहरीबीच सामान्य झडप भएपछि मन्त्री यादवको टाउको फुटाएको हो । मधेश कृषि विश्वविद्यालयको शिलान्यास कार्यक्रममा जनमत पार्टीका कार्यकर्ताले अवरोध गर्न खोजेपछि प्रहरीसँग झडप भएको थियो । सोही क्रममा यादवको टाउको फुटाएको हो ।

सो क्रममा मधेशका शिक्षा तथा संस्कृति मन्त्री महेशप्रसाद यादव, प्रदेश सांसदहरु सतिश सिंह, रञ्जु खंग र भाग्यश्री चौधरी घाइते भएको जनमतका सचिव विपी साहले बताए । उनीहरुलाई प्रहरीको लाठी लागेको छ ।

जिल्ला प्रहरी कार्यालय सप्तरीका प्रहरी प्रवक्ता डीएसपी ढुंडीराज न्यौपानेले भवन शिलान्यास कार्यक्रममा अवरोध गर्न खोजेपछि जनमतका नेता कार्यकर्तामाथि सामान्य बल प्रयोग गरेको बताए ।

जनमत पार्टीको विरोधकाबीच राजविराजमा मधेश कृषि विश्वविद्यालयको जसपा अध्यक्ष उपेन्द्र यादवले शिलान्यास गरेका छन् । राजविराज नगरपालिका वडा नम्बर १३ मा करिब १२ विघा जग्गामा विश्वविद्यालयको आफ्नै भवन निर्माणको लागि शिलान्यास गरिएको हो ।

शिलान्यासमा सप्तरी २ बाट पराजित उपेन्द्र यादवलाई नै प्रमुख अतिथि बनाएपछि जनमतले विरोध गरेको थियो । आइतबार जनमतले विश्व विद्यालयको कार्यालयमा तालाबन्दी गरेको थियो ।

शिक्षा मन्त्री यादवले कार्यक्रम रद्द गर्न वक्तव्य जारी गरेका थिए भने जनमत अध्यक्ष डा. सिके राउतले कार्यक्रम रोक्न गृह मन्त्रालयलाई पत्राचार गरेका थिए । कडा सुरक्षाबीच जनमतका मन्त्री र नेतालाई लठियाउँदै जसपाका अध्यक्ष यादवले सोमबार विश्वविद्यालयको भवन शिलान्यास गरेका हुन् ।