धनुषाको कमला नगरपालिकामा माघ ८ गते माछा, मासु र मदिरा नबेचौँः मेयर यादव

न्यूज ब्यूरो, जनकपुरधाम । पूर्वी धनुषाको कमला नगरपालिकाका मेयर विशेश्वर प्रसाद यादवले कमला नगरपालिकाभित्र माघ ८ गते माछा, मासु, मदिरा विक्री वितरण तथा सेवन नगर्न आग्रह गरेका छन् ।

करोडौँ सनातनीहरुको आस्थाको केन्द्र र उत्साहको दिन भगवान रामको प्राण प्रतिष्ठालाई मध्यनजर गर्दै मेयर यादवले कमला नगरपालिकाभित्र लाग्ने गुदरी बजार, माछामासु बजारको साथै बजारमा माछामासु तथा मदिरा समेत विक्री वितरण नगर्न आग्रह गरेका छन् ।

कमला नगरपालिकाको विभिन्न गाउँमा लाग्ने बजारमा समेत सोमबार माघ ८ गते माछा, मासु र मदिरा (दारु) विक्री वितरण नगर्न आग्रह गरेको हो ।

भारतको उत्तर प्रदेशस्थित अयोध्यामा ५५० बर्षपछि भगवान रामको मन्दिर निर्माण भएको र माघ ८ गते भव्य प्राण प्रतिष्ठा हुने भएकोले सो दिन यस्ता गतिविधिहरु नगर्न मेयर यादवले आग्रह गरेका हुन् ।

कमला नगरपालिकाको लगमा बजार, माचि बजार, सराबे बजार, मँगराहा बजार, सखुवा बजार साघारा, मडान, हथमुण्डाबजार सहित छिटफूट रुपमा समेत माछा, मासु विक्री वितरण नगर्न आग्रह गरेका छन् ।

यसको निगरानीको लागि हिन्दु सम्राट सेनासँग समन्वय गरी यस्ता गतिविधिमाथि निगरानी गरिने मेयर यादवले बताए ।