७ प्रदेशसहित १६ डिआईजीको सरुवा, मधेश प्रदेशको नयाँ डिआईजीमा पोखरेल आउँदै

न्यूज ब्यूरो, जनकपुरधाम । नेपाल प्रहरीका १६ जना प्रहरी नायब महानिरीक्षक (डीआईजी) को सरुवा भएको छ ।

गृह मन्त्रालयमा मंगलबार बसेको गृहमन्त्रीस्तरीय बैठकले प्रहरी नायव महानिरीक्षक (डीआईजी) हरूको काज सरूवा गरेको हो । जसअनुसार सबै प्रदेशका प्रहरी कार्यालय प्रमुख पनि फेरिएका छन् ।

गृह मन्त्रालयले मँगलबार जारी गरेको सरुवा, काजसरुवाको सूचनामा मधेश प्रदेशका डिआईजी जनक भट्टराईलाई सरुवा गरी प्रहरी प्रधान कार्यालय सरुवा गरिएको छ भने मधेश प्रदेशको लागि नयाँ डिआईजी यज्ञ विनोद पोखरेललाई पठाएको हो ।

प्रहरीको केन्द्रीय अनुसन्धान ब्‍यूरो महाराजगञ्जमा कार्यररत डिआईजी पोखरेललाई मधेश प्रदेश प्रहरी कार्यालय जनकपुर काज सरूवा गरिएको हो ।

गृह मन्त्रालयले अख्तियार दुरूपयोग अनुसन्धान आयोग टंगालमा कार्यरत डीआईजी चन्द्र कुबेर खापुङलाई कोशी प्रदेश प्रहरी कार्यालय विराटनगर सरूवा गरेको छ ।

यस्तै गण्डकी प्रदेश प्रहरी कार्यालय पोखरामा कार्यरत डीआईजी बुद्धिराज तामाङलाई अख्तियार दुरूपयोग अनुसन्धान आयोगमा ल्याइएको छ भने बागमती प्रदेश प्रहरी कार्यालयमा कार्यरत डीआईजी किरण राणालाई केन्द्रीय अनुसन्धान ब्यूरो महाराजगञ्ज तानिएको छ ।