सर्लाहीमा प्रहरी प्रदर्शनकारीबीच झडप, एक युवकको टाउकोमा हाने गोली, कर्फ्यू लगाईयो !

न्यूज ब्यूरो, सर्लाही । सर्लाहीमा प्रहरी र प्रदर्शनकारीबीच भएको झडपमा एक जनाको गोली लागेर मृत्यू भएको छ ।

नगर अस्पताललाई स्तरोन्नति गरेर प्रादेशिक अस्पताल बनाएर हस्तान्तरण गर्ने विषयमा झडप हुँदा एक युवकको ज्यान गएको हो । सो क्रममा सर्लाहीको बरहथवा नगरपालिका वडा नम्बर ६ घर भएका जयशंकर शाहको गोली लागेर मृत्यू भएको हो ।

आज (शुक्रबार) प्रदर्शनको क्रममा प्रहरीले चलाएको गोली लागेर शाहको मृत्यू भएको हो । शाहको मृत्यू भएपछि प्रदर्शनकारीले मेयर कल्पना कुमारीको घर सँगैको जस्ताको टहरो र गाडी जलाएका छन् ।

आन्दोलनकारीले प्रहरीको गाडी पनि तोडफोड गरेका छन् । स्थिति नियन्त्रणमा लिन हवाई फायर गरिएको सर्लाहीका एसपी प्रवीण धितालले बताए । यद्यपी, हवाई फायर गर्दा शाहको टाउकोमा कसरी गोली लागेको भन्ने बारे उनले बोल्न चाहेनन् ।

युवकको मृत्यूपछि अवस्था जटिल हुन नदिनको लागि प्रशासनले सो क्षेत्रमा कर्फ्यू आदेश जारी गरेको छ । आज (शुक्रबार) बेलुका साढे ५ देखि भोलि (शनिबार) बिहान ८ बजेसम्म बरहथवा नगर क्षेत्रको पूर्वमा सीतापुर जाने बाटोको ब्रह्मस्थान, पश्चिममा हजरिया जाने बाटोको नहर, दक्षिणमा हनुमान मन्दिर र उत्तरमा सोती–चोर्निया पुल क्षेत्रमा कर्फ्यु आदेश जारी गरिएको प्रशासनले जनाएको छ ।