सर्वसहमतिमा कमला नगरपालिकाको नगरसभा सम्पन्न, ५० करोड बढी बजेट, तलब भत्ता आउँदा हप्तादेखि

न्यूज ब्यूरो, जनकपुरधाम । पूर्वी धनुषाको कमला नगरपालिकाले नयाँ आर्थिक बर्षको लागि बजेट ल्याएका छन् । मधेश प्रदेशमा बजेट ल्याउन नसक्नेको सूचिमा रहेको कमला नगरपालिकाले जनप्रतिनीधिहरुबीच सहमति भएपछि बजेट ल्याएको हो ।

कमला नगरपालिकाको पूर्व निर्धारित तिथि अनुसार पुस १५ गतेमै नगरसभा सम्पन्न गरेको हो । नगरसभाबाट ५० करोड २५ लाख ९४ हजार ६ रुपैयाँ बजेट ल्याएको कमला नगरपालिकाका लेखा अधिकृत सँजीव महतोले जानकारी दिए ।

सो मध्ये वडास्तरीय बजेटमा १ करोड २५ लाख गरी ९ वटै वडालाई छुटयाईएको हो । जस अनुसार ११ करोड २५ लाख रुपैयाँ वडाको सिलिँग गरिएको छ भने बाँकी बजेटहरु शिक्षा, स्वास्थ्य, भौतिक पूर्वाधारमा राखिने भएको छ ।

कुन शाखामा के कति बजेट राखिने बारे अहिले तय नभएको लेखा अधिकृत महतोले बताए । उनका अनुसार, सबै जनप्रतिनीधिबीच भएको सौहार्द सहमतिले नगरसभा भएको हो ।

नगरसभाको लागि वडाध्यक्षहरुसँग मेयरको बजेट बाँडफाँडको कुरा नमिल्दा ७ महिनादेखि नगरपालिका अलपत्र परेको थियो । वडास्तरीय बजेट सिलिँग, हरहिसाबमै बाधा अडकाउ आएपछि नगरसभा हुन सकेको थिएनन् ।

नयाँ अधिकृतको रुपमा सँतोष मिश्र आएपछि उनले आएदेखि नै नगरसभाको लागि पहल थालेका थिए । जनप्रतिनीधिहरुबीचको आन्तरिक किचलो, समस्यालाई मध्यनजर गर्दै अधिकृत मिश्राले चौतर्फी जुक्ति लगाएपछि नगरसभा भएको हो ।

नगरसभाको लागि नगर प्रमुख विशेश्वर यादवले समेत लचिलोपन देखाएपछि नगरसभा सौहार्द वातावरणमा सम्पन्न भएको हो । मेयरको लचकतापछि वडाध्यक्षहरुले नगरसभाको लागि तयार भएको बुझिएको छ ।

नगर प्रमुख यादवको अध्यक्षता तथा ईलाका प्रहरी कार्यालय खजुरीका प्रहरी नीरिक्षक (ईन्सपेक्टर) राजकुमार भट्टको प्रमुख आतिथ्यमा सम्पन्न नगरसभामा प्रशासन शाखा प्रमुख बीरेन्द्र सढान, स्वास्थ्य शाखा सँयोजक रामकुमार ठाकुर, जिन्सी शाखा प्रमुख युगलकिशोर यादव, रोजगार शाखाका चन्द्रप्रकाश यादव, कृषि शाखाका प्रमुख ओम नारायण यादव, लेखा शाखा प्रमुख सँजीव महतो, शिक्षा शाखाका अमित जश्यवालसहित विभिन्न शाखाका अधिकृत, कर्मचारी, सचिव, ९ वटै वडाका वडाध्यक्ष, वडा सदस्यहरु, कार्यपालिका सदस्यहरुसहित विभिन्न राजनीतिक पार्टीका प्रतिनीधिहरुको समेत सहभागीता रहेको थियो ।