जनकपुरः घुससहित पक्राउ परेका वडाध्यक्ष र सचिव दोषी ठहर, तोकियो सजाय

न्यूज ब्यूरो, जनकपुरधाम । ७० हजार रुपैयाँ घुससहित पक्राउ परेका वडाध्यक्ष र वडासचिवलाई कैद सजाय भएको छ ।

धनुषाको नगराइन नगरपालिका वडा नम्बर २ का वडाअध्यक्ष वुलन यादव र सोही वडाका वडा सचिव अमृत नारायण मिश्र भ्रष्टाचार मुद्दामा दोषी ठहर भएका छन् ।

सडक निर्माणको कार्य सम्पन्न पश्चात भुक्तानीको लागि पूर्वाधार विकास कार्यालय, धनुषालाई सिफारिस गरी दिएवापत सेवाग्राहीसँग उनीहरुले ७० हजार रुपैयाँ घुस लिएका थिए ।

अख्तियार दुरुपयोग अनुसन्धान आयोगको टोलीले गत जेठमा उनीहरूलाई घुससहित रंगेहात पक्राउ गरेको थियो । बिशेष अदालतले शुक्रबार दुवैलाई दोषी ठहर गरेको हो । ७० हजार घुसको मुद्दामा चार देखि ६ महिनासम्म कैद सजाय हुने कानूनी प्रावधान छ ।