चुरे वन क्षेत्र उत्खनन गर्न अनुमति दिएको आरोपले अनुसन्धानमा तानिए दुई अधिकृत

न्यूज ब्यूरो, सिरहा । सिरहामा चुरे वन क्षेत्रमा उत्खनन गर्न आदेश दिने दुई प्रमुख प्रशासकीय अधिकृतमाथि अनुसन्धान सुरु भएको छ ।

चुरे वन क्षेत्रमा पर्ने खुट्टी खोला र सर्रे खोला गैर कानूनी रुपमा ठेक्का लगाउने र उत्खनन् गर्न इजाजत दिने दुई वटा नगरपालिकाका प्रमुख प्रशासकीय अधिकृतहरु अनुसन्धानमा तानिएको डिविजनल वन अधिकृत सुजित कुमार झाले बताएका छन् ।

डिभिजनल वन अधिकृत झाका अनुसार धनगढीमाई नगरपालिका र लहान नगरपालिकाका प्रमुख प्रशासकीय अधिकृत द्वय क्रमशः ओम प्रकाश महतो र राजु प्रसाद साहमाथि अनुसन्धान भईरहेको छ ।

चुरे पर्वत र वन क्षेत्रको नदीनालाबाट अवैध तथा गैर कानूनी रुपमा माटो, गिट्टी, बालुवा , ग्राभेल र ढुंगा जस्ता प्राकृतिक श्रोत उत्खनन् गर्ने विरुद्ध डिभिजनल वन कार्यालय लहानले कठोर कदम चालेको छ ।

गत मंसिर १४ गते लहान नगरपालिका वडा नम्बर १५ र वडा नंं २४ ९साविक ढोढना गाविस० को बीचोबिच बग्ने नदी खुट्टी खोलाबाट अवैध उत्खनन् गरिरहेको अवस्थामा डिभिजनल वन कार्यालय लहानको गस्ती टोलीले चालक सहित २ वटा स्काभेटरलाई नियन्त्रणमा लिएर कारवाही चलाएको छ ।

पक्राउ पर्नेमा चाइना इष्ट वेष्ट रेल्वे कम्पनीका साइट इन्चार्ज हु स्याउ छ्याङ्ग सहित अन्य एक चीनिया नागरिक तथा विन्देस्वर कुमार महतो एवं अजय कुमार चौधरी दुई जना नेपाली नागरिक थिए । पक्राउ गरिएकाहरु जिल्ला अदालत सिरहाको आदेशानुसार मंसिर २५ गते चीनियाँ नागरिक ३ लाख र नेपाली नागरिकहरु जनही ५० हजार धरौटीमा रिहा भएका छन् । चीनियाँ कम्पनीको अन ड्युटीमा रहेको दुई थान स्काभेटर भने डिभिजनल वन कार्यालयको नियन्त्रण मै राखिएको छ ।

त्यसैगरी मंसिर १५ गते धनगढीमाई नगरपालिका अन्तर्गतको सर्रे खोलाको वन क्षेत्रबाट नियन्त्रणमा लिइएको ८ थान ट्रयाक्टर र एक थान स्काभेटर (जेसिबी) इलाका वन कार्यालय धनगढीको नियन्त्रणमा राखिएको छ ।

ट्रयाक्टर र स्काभेटर चलाउने ८ जना चालकहरु भने अझै पनि डिभिजनल वन कार्यालय लहानको हिरासतमा रहेका छन् । उनीहरुलाई वन क्षेत्रबाट अवैध रुपमा नदीजन्य पदार्थ उत्खनन् गरेको अभियोगमा हिरासतमा लिई अनुसन्धान गरी रहेको डिभिजनल वन अधिकृत झाले बताए ।

हिरासतमा रहेकाहरु धनगढीमाई ९ का मञ्जित यादव , वडा नंं ४ का रामकुमार यादव, वडा नम्बर १२ का पुरुषोत्तम यादव, रमण किशोर यादव, अरविन्द कुमार यादव,वडा नम्बर १० का इन्द्रजित महतो, बरियारपट्टी २ का सन्दीप कुमार महतो र नरहा २ का फूल कुमार यादव रहेका छन् । थुनुवाहरु माथि अनुसन्धान चलिरहेको डिभिजनल वन अधिकृत झाले जानकारी दिए ।

यता, आरोपित लहान नगरपालिकाका अधिकृत साहले केही मिडियाहरुमा आएको समाचारको खण्डन गर्दै पक्राउ पूर्जी जारी नभएको बताए । उनले पक्राउ पूर्जी जारी भएको समाचार तथ्यगत नरहेको तथा प्रोपोगाण्डा मात्र रहेको बताए ।

चुरे उत्खननको विषयमा आफूलाई जानकारी आएको बताउँदै अधिकृत साहले आफू कानुन र प्रशासनलाई भरपुर सहयोग गर्ने बताए ।

सोही क्रममा अधिकृत ओमप्रकाश महतोले विभिन्न सँचारमाध्यममा आएको समाचार भ्रामक रहेको बताए । उनले अनुसन्धान भईरहेको र आफूले परेको बेला सहयोग गर्ने बताए । आफू कार्यालयमै निरन्तर रहँदै आएको बताए ।

जानकारी अनुसार, दुवै जना अधिकृतलाई राजनीतिक हिसाबले फँसाउन खोजिएको हो । राजनीतिक प्रोपागाण्डा अनुरुप अधिकृतद्धयले कानुन विपरित कार्य गर्न नमान्दा दुवै जनालाई फँसाउन खोजिएको आरोप छ ।

---

पुनश्चः यअअघिको समाचारको शिर्षकमा पक्राउ पूर्जी जारी भएको तथ्य अन्यथा भएकोले समाचारको शिर्षक सच्याईएको छ । यसको लागि हामी क्षमा प्रार्थी छौँ ।- सम्पादक