अस्पतालले जिउँदैलाई मृत घोषणा गरेको आरोप, अस्पताल भन्छन्, 'हामीले मृत घोषणा गरेकै होईन'

न्यूज ब्यूरो, विराटनगर । कोशी प्रदेशको राजधानी विराटनगरस्थित रहेको मेट्रो न्यूरो हस्पिटलमा मृत घोषणा गरिएका एक विरामी जिउँदै उठेको आरोप लगाएको छ ।

अस्पतालले मृत घोषणा गरी १५ घण्टासम्म शवगृहमा राखेर अन्तिम दाहसंस्कारका लागि घाट लैजान लागेका एक व्यक्ति जीवितै रहेको दाबी परिवारजनले गरेको छ ।

विराटनगरस्थित मेट्रो न्युरो अस्पतालले मृत्यु प्रमाणपत्रसमेत बनाएर १५ घण्टासम्म शवगृहमा राखेर दाहसंस्कारका लागि पठाएका इनरुवा नगरपालिका वडा नं. ३ का ४५ वर्षीय प्रताप सदा मुसहरलाई घाटमा लैजान लाग्दा जीवित नै उठेको दाबी परिवारजनले गरेको हो ।

सदालाई शनिबार बिहान उपचारका क्रममा मेट्रो न्युरो अस्पताल भर्ना गरिएको थियो । स्थानीय बसचोकमा आउने जाने गाडीमा सामान लोड अनलोड गरी जीविकोपार्जन गर्दै आउनुभएका सदा गाडीमा सामान लोड गर्ने क्रममा लडेर बेहोस भएपछि तत्काल इनरुवा अस्पताल लगिएको र त्यहाँ उपचार सम्भव नहुने भन्दै विराटनगरमा रहेको कोशी अस्पताल रिफर गरिएको थियो ।

उपचारका क्रममा कोशी अस्पताल लगिएका सदाको टाउकोको तत्काल एमआरआई गर्नुपर्ने चिकित्सकले सुझाव दिएपछि सदालाई मेट्रो न्युरो अस्पतालमा भर्ना गरिएको उनकी श्रीमती सीता सदाले बताईन् ।

शनिबार दिउँसो सो अस्पतालमा भर्ना गरिएका सदाको उपचारका क्रममा राति मृत्यु भएको अस्पतालले घोषणा गरेको दाबी उनकी श्रीमतिले गरेकी हुन्। उपचारका क्रममा लागेको ५० हजार रुपियाँ तिरेर शव लैजान भन्दै शवगृहमा राखिएका सदाको शव लैजान स्थानीय छिमेकी तथा आफन्तले आइतबार बिहानदेखि चन्दा रकम जुटाई अस्पताललाई तिरेर दाहसंस्कारका लागि इनरुवा ल्याइएको आफूलाई समाजसेवी भनाउने राजेन्द्र पोख्रेलले विभिन्न सँचारमाध्यममा वक्तत्व दिएका छन ।

सदाको दाहसंस्कारका लागि उनीहरूको जातीय संस्कार र परम्परा अनुसार सबै तयार गरी मलामीसमेत जुटेर घाट लैजान लाग्दा सदा जीवित पाइएको दाबी गरिरहेका छन् ।

अस्पतालले मृत घोषणा गरेर घर ल्याइएका सदाको दाहसंस्कारका लागि परिवार र आफन्तजनले हरियो बाँस, कात्रो, रामनामी, तिल, जौ, अबिरलगायत टीका, चुरापोते आदि सामग्री किनमेल गरिसकेका थिए । उनको दाहसंस्कारपछि श्रीमतीले लगाउने कपडासमेत व्यवस्था गरिसकिएको बताईएको छ ।

सबै आफन्त छरछिमेक भेला भई स्थानीय सुनसरी खोलामा दाहसंस्कारका लागि लैजान लाग्दा केही व्यक्तिले उनलाई जीवित रहेको जस्तो देखेपछि पानी र दुध खुवाएको स्थानीयले बताएका थिए । त्यसपछि सदाको स्वास्थ्य सुधार हुँदै सामान्य बन्दै गएको र घरमै राखिएको दाबी परिवारजनको छ ।

यता, अस्पताल प्रशासनले अस्पतालबाट कुनै प्रकारको मृत घोषणा वा मृत घोषणाको प्रमाणपत्र नदिएको दाबी गरेका छन् । मेट्रो न्यूरो हस्पिटलको अस्पताल प्रशासनले अस्पतालबाट मृत घोषणा नगरिएको तथा मृत्यूको प्रमाण पत्र जारी नगरिएको बताएको छ ।

प्रशासनले अस्पतालबाट विरामी प्रताप सदाकी श्रीमति सीता सदाले “लामा कन्सेन्ट” अर्थात आफूखुसी विरामीलाई यस अस्पतालबाट अन्यत्र वा घर लिएर जाँदैछु भनेर मञ्जुरनामा गरेको प्रमाण दिएको छ । अस्पताल प्रशासनको अनुसार, अस्पतालमा भर्ना भएदेखि प्रतापलाई जिउँदै घर लगेसम्मको सिसिटिभी भिडियो फुटेज सुरक्षित रहेको भन्दै मानहानीको मुद्दा गर्ने बताएको छ ।

सँस्थालाई बदनाम गर्नको लागि एक गरिब निमुखामाथि केही व्यक्तिहरुले राजनीति साधेको आरोप लगाउँदै अस्पताल प्रशासनले मृत घोषणा नै नगरेकालाई अस्पताललाई हवाला दिनु योजना तहत षडयन्त्र रहेको बताएको छ ।

प्रताप सदाकी श्रीमति सीता सदाले आफूखुसी आफ्नो श्रीमानलाई घर लिएर जाँदैछु भनेर लामा कन्सेन्टमा हस्ताक्षर समेत गरेको देखिएको छ । सीताले अस्पतालले गराएको मन्जुरनामामा आफ्नो विरामीलाई आफ्नो मर्जीले लिएर जाने तथा सो क्रममा केही भएमा आफैँ जिम्मेवार हुने उल्लेख छ । सो मन्जुरनामाले प्रताप सदा जिउँदै रहेको प्रमाणित समेत हुन्छ ।

विरामी प्रताप सदाकी श्रीमतिले गरेको मन्जुरनामा

अस्पतालसँग रकम असुली गर्नको लागि वा रिसबई साध्नको लागि समेत यस्तो नाटक रचेको हुन सक्ने शंका गरिएको छ । विरामी पक्षले डेथ सर्टिफिकेट दिएको दाबी गरेपनि सार्वजनिक भने गर्न सकेका छैनन् । अस्पतालले भने सर्टिफिकेट नै जारी नगरेको दाबी गरेको छ ।