अब सर्लाहीमा पनि खुल्यो यातायात व्यवस्था कार्यालय, लाईसेन्स बनाउन बर्दिवास वा जनकपुर आउनुनपर्ने

न्यूज ब्यूरो, जनकपुरधाम । मधेश प्रदेशको सर्लाही जिल्लास्थित यातायात व्यवस्था कार्यालय सँचालनमा आएको छ ।

सवारी चालक अनुमति पत्र (लाईसेन्स) बनाउनको लागि सर्लाही बाहिर जानुपर्ने अवस्थालाई मध्यनजर गर्दै आईतबारदेखि यातायात व्यवस्था कार्यालय सँचालनमा आएको हो ।

सर्लाहीको सदरमुकाम मलङ्वास्थित जिल्ला समन्वय समिति (जिसस) को भवनमा आईतबार यातायात व्यवस्था कार्यालय स्थापना गरिएको हो । मधेस प्रदेशका श्रम तथा यातायात मन्त्री चन्दन कुमार सिंहले उद्घाटन गरी कार्यालय सँचालनको हरियो झण्डी देखाए ।

जिल्लामा यातायात सेवा कार्यालय नहुँदा यहाँका सेवाग्राहीहरु सेवा लिन बिरगंज , गौर, बर्दिबास र जनकपुर लगायतका ठाउमा धाउनुपर्ने अवस्था रहेकोमा अबदेखि जिल्लामै सेवा कार्यालय खुलेपछि अब बाहिर जिल्ला धाउनु पर्ने बाध्यता हटेको हो।

कार्यालयबाट सवारी चालक अनुमति पत्र जारी तथा नवीकरण, सवारी किताब दर्ता तथा नवीकरण, रुट परमिट लगायतका सेवा प्रदान गरिने कार्यालय प्रमुख राकेश यादवले जानकारी दिए ।

मलङ्गवाको कार्यालय प्रदेश स्तरको भएपनि यसले देशभरका सेवाग्राहीलाई सेवा प्रवाह गर्ने कार्यालय प्रमुख यादवको भनाइ छ । काठमाडौं पुगेर यातायात व्यवस्था विभागबाट युजर तथा पासपोर्ट लिएर आउने र सम्भव भएसम्म यसै हप्ताभित्र सेवा प्रवाह सुरु गर्ने यादवले बताए ।

उनका अनुसार जग्गा प्राप्त भएपछि आफ्नै ट्रायल सेन्टर निर्माण गर्न बजेट माग गरिने कार्यालय तत्काल आफ्नै सरकारी ट्रायल सेन्टर नभएकाले जिल्लाभर कहिँकतै निजी ट्रायल सेन्टरसँग समन्वय गरिने बताए ।