मुख्यमन्त्री जनताको पैसाले फिल्मी हिरो जस्तो ठुलठुला पोष्टर मात्र लगाए, काम एउटा पनि गरेनन्ः साँसद ठाकुर

न्यूज ब्यूरो, जनकपुरधाम । मधेश प्रदेशका साँसद दीपेन्द्र ठाकुरले मधेशका मुख्यमन्त्रीप्रति तँज कसेका छन् । उनले मुख्यमन्त्रीलाई बलिवुडको हिरोको सँज्ञा व्याँगात्मक रुपमा दिए ।

सोमबार बसेको प्रदेश सभा सदस्यहरुको बैठकमा बोल्दै साँसद ठाकुरले मुख्यमन्त्री सरोजकुमार यादवलाई आफ्नो ठुल ठुला होडिँग बोर्ड लगाउनु बाहेक अन्य कुनै पनि काम नगरेको बताए ।

नेकपा एमालेबाट धनुषा निर्वाचन क्षेत्र नं. ३ (ख) बाट निर्वाचित साँसद ठाकुरले मुख्यमन्त्री यादवले एक बर्षको कार्यकालमा अहिलेसम्म ३७ लाख रुपैयाँको आफ्नो पोष्टर र बैनर मात्र लगाएको आरोप लगाए ।

उनले जनताको पैसाबाट लाखौँको होडिँग बोर्ड लगाउनु बाहेक अन्य एउटा पनि सराहनीय कार्य गरेको भए देखाउन चुनौति दिए । झण्डै चार महिनापछि बसेको सँसद बैठकमा उनले मुख्यमन्त्रीको एउटा नै सराहनीय कार्य देखाइदिन साँसदहरुसँग चुनौति दिए ।

विश्वासको मत लिने बेलामा सबै दलको विश्वासको मत लिएर सरकार चलाएपनि एक बर्षमा मुख्यमन्त्री यादवले एउटा नै सराहानीय कार्य गर्न नसकेको बताए । उनले जनताको करबाट होडिँग बोर्ड लगाएको भन्दै त्यो रकम कसैको बापको बपौति नभएको बताए ।

संघीयताको जननी मानिएको मधेश प्रदेशको हालातप्रति दुःख प्रकट गर्दै साँसद ठाकुरले जनताहरु सलबलाउन थालेको बताए । उनले आफूसहित अन्य दलका साँसदहरुलाई जनताको लागि केही नगरेको भन्दै जनता सडकमा आउन बेर नलगाउने बताए । उनले ४ महिनादेखि प्रदेश सभा बैठक स्थगित रहेपनि चार महिनाको तलब साँसदहरुले खाँदा लाज लाग्नुपर्ने बताए ।

उनले ल्याप्चेछाप (औठाछाप) लाई पिए राखेर अधिकृत स्तरको तलब दिने, सरकारी सवारी दुरुपयोग गर्ने बाहेक मधेश प्रदेशका साँसदहरुले केही नगरेकोप्रति आक्रोस प्रकट गरे ।