कारवाहीमा परेका एसपीको विदाईमा चाप्लुसी, नागरिक समाजदेखि पत्रकारसम्म नतमस्क

न्यूज ब्यूरो, जनकपुरधाम । आरती साह मृत्यू प्रकरणमा कारवाही भोगेका धनुषाका तत्कालिन एसपी विश्वराज खड्काको विदाईको लागि जनकपुरमा दलालहरुको ताँति देखियो ।

जनकपुरकी आरती साहको मृत्यू प्रकरणमा आफ्नो जिम्मेवारीप्रति बेईमानी गरेको आरोपमा हेडक्वाटर तानिएका एसपी खड्कालाई विदाई गर्नको लागि विहिबार जनकपुरका नागरिक समाजदेखि पत्रकारहरुको ताँती देखियो ।

सो क्रममा एसपीसँग प्रत्यक्ष कनेक्सन रहेका तस्करहरुको सँख्या पनि उत्तिकै देखिएको थियो । कारवाही भोगेका एसपीको विदाईको लागि जनकपुरका नागरिक समाजको विदाई, विभिन्न सँघ सँस्थाहरुको फूलमाला अर्पणले दासत्वको परिचय गराईरहेको देखियो । जसमा जनकपुरका केही पत्रकारहरु पनि सामेल देखिए ।

आरती साह न्यायको चुईँक नबोलका राजनीतिक दलका अगुवाहरुको समेत फूलमाला अर्पणले उनीहरुको नैतिकतामाथि प्रश्न समेत उठेको छ । राष्ट्रको चौथो अँग मानिएका जनकपुरका कथित पत्रकारहरुको उपस्थितिले पनि उनीहरुको नैतिकतामाथि प्रश्न उठेको हो ।

धनुषाको नयाँ एसपीको रुपमा मित्रबन्धु शर्मालाई स्वागतको लागि पनि पुनः त्यही समूहले भव्य स्वागत गर्ने भएको छ । यसलाई समाजिक सँजालमा चाप्लुसबाजको सँज्ञा दिइएको हो ।