प्रिन्सिपल स्वर्णकारको हत्या आरोपमा एक शिक्षिकासहित आधा दर्जन शंकास्पद व्यक्ति पक्राउ

न्यूज ब्यूरो, बारा । सोमबार बारा जिल्लाको कलैयास्थित एक प्रिन्सीपललाई गोली हानी हत्या गरेको आरोपमा एक पूर्व शिक्षिकासहित ६ जना पक्राउ गरेको छ ।

बारा प्रहरीले सोमबार नै विशेष अपरेशन चलाएर हत्यामा सँलग्न हुन सक्ने आशंकामा रुपेश स्वर्णकारकै स्कूलमा पढाउने पूर्व शिक्षिकासहित अन्य ५ जनालाई पक्राउ गरी अनुसन्धान थालेको हो ।

कलैयास्थित बाल एकता इङ्गलिस बोर्डिङ स्कुलका प्रिन्सिपल रुपेश स्वर्णकारको सोमबार दिउँसो गोली हानी हत्या भएपछि प्रदेशभरि हडकम्प मच्चिएयो । हत्यामा संलग्न रहेको आशंकामा प्रहरीले एक महिलासहित ६ जनालाई पक्राउ गरेको छ ।

बाराका प्रहरी प्रवक्ता डिएसपी दधिराम न्यौपानेले तीन जना नेपाली र तीन जना भारतीय नागरिकलाई पक्राउ गरेर अनुसन्धान गरिरहेको जानकारी दिए ।

पक्राउ पर्नेहरुमध्ये एक जना उनकै विद्यालयमा काम गर्ने पूर्वशिक्षिकासमेत रहेको प्रहरी स्रोतले जनाएको छ । पक्राउ परेकाहरुको नाम भने प्रहरीले खुलाएको छैन ।

सोमबार दिउँसो दुई वटा मोटरसाइकल चढेर आएका चारजनाको समूहले स्वर्णकारमाथि गोली प्रहार गरेर भागेको प्रहरीको भनाइ छ । टाउको र छातीमा गोली लागेर गम्भीर घाइते भएका स्वर्णकारको उपचारका क्रममा वीरगन्जस्थित बयोधा अस्पतालमा मृत्यु भएको थियो ।

आपसी सम्बन्ध र रिसिबीको कारण स्वर्णकारको हत्या भएको प्रहरीको प्रारम्भिक अनुमान छ ।