आन्दोलनमा एक जना मात्र प्रतिनीधि जानु, बाँकी शिक्षकहरु नियमित पढाउनुसः अध्यक्ष यादव

न्यूज ब्यूरो, जनकपुरधाम । धनुषाको जनकनन्दिनी गाउँपालिकाका अध्यक्ष दिपिनदेव यादवले शिक्षक आन्दोलनलाई नैतिक समर्थन गर्दै अध्ययन अध्ययापनलाई निरन्तरता दिन आग्रह गरेका छन् ।

गाउँपालिका अध्यक्ष यादवले एक प्रेस विज्ञप्ति जारी गर्दै देशको राजधानी काठमान्डौँस्थित जारी रहेको शिक्षक आन्दोलनको लागि जनकनन्दिनी गाउँपालिकाभित्रको प्रत्येक समुदायिक विद्यालयबाट एक एक जना मात्र प्रतिनीधि सँघर्षको लागि पठाएर बाँकी शिक्षकहरु नियमित पठनपाठनमा फर्किन आग्रह गरेका हुन् ।

गाउँपालिकाभित्रको विद्यालयहरुमा नियमित पठनपाठन बन्द भएपछि बालबालिकाहरुको मनोविज्ञानमा असर पर्ने भन्दै विद्यालयबाट एक जना मात्र प्रतिनीधि आन्दोलनमा पठाएर बाँकीका शिक्षकहरु नियमित पठनपाठनको लागि आउन आग्रह गरेका हुन् । अध्यक्ष यादवले आईतबारदेखि नै शिक्षकहरुलाई विद्यालयमा बोलाएका हुन् ।

विद्यालयबाट सँघर्षको लागि एक जना मात्र प्रतिनीधि राखेर विद्यालयका प्रधानाध्यापक, शिक्षक, विद्यालय कर्मचारी नियमित रुपमा विद्यालय आउन पत्राचार समेत गरेका हुन् । उनले पत्रलाई अवज्ञा गरिए प्रचलित कानुन बमोजिम कारवाहीको चेतावनी समेत दिएका छन् ।