सर्लाहीमा पुनः दुई समुदाय विच झडप, एकको अवस्था गम्भिर, कर्फ्यू लगाईयो

न्यूज ब्यूरो, सर्लाही । सर्लाहीको सदरमुकाम मलंगवामा दुई समुदायबीच भएको झडपको हप्तौं नबित्दै फेरि हिन्दू र मुस्लिम समुदायबीच झडप भएको छ।

आज (बिहिबार) पनि सर्लाहीको मलंगवा नगरपालिका वडा नम्बर ३ स्थित गणेश चतुर्थीको मुर्ति सेलाउन जाने क्रममा झडप भएपछि अवस्था तनावग्रस्त बनेको छ। झडप नियन्त्रण गर्ने ठुलो संख्यामा प्रहरी परिचालन गरिएको छ।

झडपको क्रममा केही व्यक्ति घाइते समेत भएको र उपचारको लागि प्रदेशिक अस्पताल मलंगवामा पठाइएको स्थानीय बताए। मुर्ति सेलाउने क्रममा हिन्दू समुदाय माथि मुस्लिम समुदायका केही व्यक्तिले घरको छतमाथि बाट तातो पानी र ढुंगा फालेको स्थानिय हिन्दू पक्षधरहरुको भनाइ रहेको छ।

केही दिन अगाडि भएको झडप पस्चात दुई समुदायका बिच सदभाव कायम गर्न रैलि समेत निकालिएको थियो तर आज पुनः झडप भएको छ।

सो क्रममा स्थानीय एक युवकमाथि चक्कु प्रहार गरिएको छ । स्थानीय सुजित यादवमाथि चक्कु प्रहार गर्दा गम्भिर घाईते भएका छन् । उनको अवस्था चिन्ताजनक रहेको छ । उनको पेटमा चाकु प्रहार गरिएको जनाइएको छ ।

यता, अवस्थालाई मध्यनजर गर्दै जिल्ला प्रशासन कार्यालय सर्लाहीले पुनः कर्फ्यू लगाएको छ । पूर्वमा झिम नदी, पश्चिममा मुसैली नहर, दक्षिणमा नेपाल–भारत बोर्डर र उत्तरमा प्रहरी पोष्ट र बाबा पेट्रोल पम्पसम्म कर्फ्यू लगाईएको हो ।