'गाई खानेलाई खान दिनुपर्ने' भन्ने जसपाकी साँसद तत्मा विरुद्ध हिन्दु सम्राट सेनाको प्रदर्शन

न्यूज ब्यूरो, जनकपुरधाम । धरानमा गोरु काटेर खाएपछि समाजिक सँजालमा गाई खानेलाई खान दिनुपर्ने टिप्पणी गरेकी जनता समाजवादी पार्टी (जसपा) नेपालकी प्रदेश साँसद ललिता दास तत्माविरुद्ध नाराबाजी गरिएको छ ।

मधेश प्रदेशको सिरहा जिल्लाको पूर्व पश्चिम राजमार्ग अन्तर्गत सिरहाको चोहर्बामा हिन्दु सम्राट सेनाले साँसद तत्माविरुद्ध प्रदर्शन गरेको हो । संविधानमा गाई गोरु काटेर खान नहुने उल्लेख हुँदाहुँदै जसपाकी साँसद तत्माले एक फेसबुक पोष्टमा “गाई गोरु खानेलाई खान दिनुपर्छ” भन्ने टिप्पणी गरेपछि उनको चौतर्फी विरोध भएको हो ।

एक राजनीतिक दलकी साँसद भएर संविधान विपरितको टिप्पणी र धर्म विरोधी टिप्पणी दिएको भन्दै हिन्दु सम्राट सेना सिरहाले उनको विरोध गरेको हो । चोहर्बा चोकमा सेनाका पदाधिकारी, सदस्यहरुले साँसद तत्मा विरुद्ध दुई घण्टासम्म प्रदर्शन गरेको हो ।

हिन्दु सम्राट सेनाले राष्ट्रिय जनावरलाई काटेर खान दिनुपर्ने अभिव्यक्ति दिएको भन्दै साँसद तत्मालाई कारवाहीको माग गरेको हो । उनीहरुले जसपासँग उनलाई कारवाही गर्न माग गरेको हो ।

केही दिन अगाडी कोशी प्रदेशको धरानमा एक समुदायका व्यक्तिहरुले सार्वजनिक रुपमै गोरु काटेर भोजभतेर गरेको भिडियो समाजिक सँजालमा आएकापछि विभिन्न टिकाटिप्पणी हुँदा साँसद तत्माले खानेलाई खान दिनुपर्ने टिप्पणी गरेकी थिईन् । यद्यपी, उनले सो टिप्पणीको लागि माफी समेत स्टेटसमार्फत मागि सकेकी हुन् ।