जनकपुरः मोहरमको क्रममा दुई युवकमाथि आक्रमण, फोटो खिचेपछि पत्रकार पनि लखेटिए

न्यूज ब्यूरो, जनकपुरधाम । मधेश प्रदेशको राजधानी जनकपुरधाम आसपास क्षेत्रमा मोहरम पर्व मनाउने क्रममा दुई समुदायबीच समान्य झडप भएको छ ।

मुस्लिम धर्मावलम्बीहरुले मनाउने मोहरम पर्वको बेला आमालाई लिएर घर जाँदै गर्दा महोत्तरीका रबिन कुमार यादवमाथि मुस्लिम समुदायका केही युवकहरुले निर्घात कुटपिट गरेको बताईएको छ ।

महोत्तरी जिल्लाको मठियानी नगरपालिका अन्तर्गत पर्ने बरदाहा गाउँमा जनकपुरबाट आमालाई लिएर जाँदै गर्दा बाटोमा घेरा हालेर बिना कसुर दुई युवकमाथि निर्घात कुटपिट गरिएको हो । रबिन यादवसँगै गगन कुमार महतो नामक युवकलाई समेत निर्घात कुटपिट गरिएको हो ।

उनीहरुलाई बिना कारण समुदायिक हिसाबले हमला गरेको आरोप लगाईएको छ । रबिन कुमार यादवलाई जनकपुरधामस्थित रामजानकी हस्पिटलको आईसीयूमा भर्ना गरिएको छ भने गगन महतोको पनि उपचार भईरहेको छ ।

फोटो खिच्दा पत्रकार पनि लखेटिएः
मोहरमको अवसरमा रिपोर्टिँग गर्न बाहिर निस्केका न्यूज ब्यूरोका सहकर्मी रितेश शर्मालाई केही मुस्लिम युवकहरुले आक्रमण प्रयास गरेका छन् । जनकपुरदेखि पश्चिम रहेको लादोबेला स्थित नेपालको झण्डासँगै गाडिएको ईस्लामिक झण्डाको तस्विर कैद गरिरहँदा २०÷२५ जना मुस्लिम युवकहरुले लाठी भाटा लिएर आक्रमण प्रयास गरेका हुन् ।

मोटरसाईकलमा रहेका सहकर्मी शर्माले मात्र तस्विर कैद गर्न खोज्दा उनीमाथि जाईलागेका थिए । आक्रमण गर्न युवकहरु दौडेपछि शर्मा फोटो नलिदै भागेका थिए । मोटरसाईकल तेज गतिमा कुदाएर उनले ज्यान बचाएको बताएका छन् ।

जिल्ला प्रशासन कार्यालय धनुषाले पर्वको नाममा यस्ता गतिविधिहरु नगर्न चेतावनी दिएपनि मुस्लिम समुदायका केही युवकहरुले उदण्डता प्रदर्शन गरेका छन् । यद्यपी, जनकपुरमा भने शान्तीपूर्ण रुपमा पर्व मनाइएको हो ।