जनकपुरः ५ भारतीय नागरिककालाई नेपाली नागरिकता, छानबिन गर्न चाहदैनन प्रशासन

न्यूज ब्यूरो, जनकपुरधाम । मधेश प्रदेशको राजधानी जनकपुरधामस्थित एक भारतीय नागरिकको स–परिवारलाई नेपाली नागरिकताको प्रमाण पत्र दिइएको खुलेको छ ।

आफू नेपाली नागरिक रहेको दाबी गर्दै आएका जनकपुरधाम उपमहानगरपालिका वडा नं. ७ बस्दै आएका भारतीय नागरिक राजेन्द्र साह सुडीले सबै परिवारलाई नेपाली नागरिकता दिलाएका छन् ।

गत वि.सं. २०६४ सालमा सुडीले नाम परिवर्तन गरी नेपाली नागरिकता लिएको सबुत प्रमाणहरु देखिएको छ । उनी विरुद्ध दोहोरो नागरिकताको लागि मुद्दा दायर गर्न जाँदा जिल्ला प्रहरी कार्यालय धनुषा र जिल्ला प्रशासनले समेत मुद्दा दर्ता नगरिदिएको हो ।

महतोले २०६४ सालमा नागरिकता नम्बर ३९६९४७३४ पाएका छन् । उनको छिमेकी मुलुक भारतको निर्वाचन प्रणालीमा समेत नाम दर्ता रहेको छ । भारतको बासिन्दा रहेका महतो विगत केही बर्षदेखि जनकपुरमा आएर बसी उनले लाखौँ रुपैयाँ पेलेर नेपाली नागरिकता पाएका हुन् । नेपाली नागरिकताको लागि सिडिओ, सहायक सिडिओ र सरकारका कर्मचारीसहित दलाल, बिचौलियाहरुले मदत गरेका थिए ।

नेपाली नागरिकतामा उनको बुवाको नाम उत्तिम साह सुडी, श्रीमतिको नाम बच्चिया देवी साह, आमाको नाम सुदामा देवी साह रहेको प्रष्ट छ । सोही हुबहु तथ्याँकमा थर मात्र परिवर्तन भारतको मतदाता नामाबली समेत देखिएको छ । यस हिसाबले उनी भारतीय नागरिक भएर जनकपुरमा आई नेपाली नागरिकता लिएर बस्दै आएका छन् ।

भारतीय ग्राम पँचायत चुनावको मतदाता नामाबलीमा महतो परिवार

भारत बिहारको ग्राम पँचायत मतदाता नामाबलीमा चोरौड भन्ने स्थानको लागि राजेन्द्र साह सुडीको अरिजनल नाम राजेन्द्र महतो रहेको छ । उनको छोराहरुमा सँतोष महतो र निरज महतो रहेका छन् । जबकी, उनीहरुले प्राप्त गरेको नेपाली नागरिकतामा निरज साह सुडी र सँतोष साह सुडी उल्लेख छ । उनको बुवाको नाम उत्तिम महतो लेखिएको छ । भारतीय नागरिकता र नेपाली नागरिकतामा मात्र थर परिवर्तन गरिएको छ । भारतीयमा महतो र नेपालीमा साह सुडी जोडिएको छ ।

निर्वाचन आयोग नेपालले जारी गरेको २०७८ सालको मतदाता नामाबलीमा राजेन्द्रसहित उनका छोराहरु, बुवा र श्रीमतिको समेत मतदाता प्रमाणपत्र देखिएको छ । भारतीय मतदातामा नामाबलीमा समेत रहेका राजेन्द्र महतोको परिवार नेपालमा समेत नागरिकता लिई नेपाल सरकारको सुख सुविधा भोग्दै आएका छन् ।

नेपालको मतदाता नामाबलीमा महतो परिवार (थर परिवर्तन गरि)

२०६४ सालमा उनले नागरिकता लिएपनि २०७८ सालको नेपालको मतदाता नामाबलीमा उनीहरुको नाम आउनु पूर्व वडाध्यक्ष जानकी राम साहको समेत सँलग्नताको आशंका गरिएको छ । सो प्रकरणमा प्रशासनले छानबिन गरे पूर्व वडाध्यक्ष, वडासचिव, जिप्रका धनुषाका कर्मचारीसमेत कानुनी फन्दामा आउनेछ भने बिचौलिया समेत पक्राउ पर्नेछ ।