जनकपुरको संकटमोचनमा उपद्रव मच्चाएका हिन्दु सम्राट सेनाले सार्वजनिक माफी मागेपछि छाडिए

न्यूज ब्यूरो, जनकपुरधाम । जनकपुरस्थित सँकटमोचन माविमा पसेर उपद्रव गर्नेहरुले सार्वजनिक माफी मागेपछि छाडिएको छ । उनीहरुले केही क्षतिपूर्ति समेत दिएपछि उनीहरुलाई शसर्त छाडिएको हो ।

गत जेठ १४ गते सँकटमोचन विद्यालयमा पसेर हिन्दु सम्राट सेनाको सदस्य हुँ भन्दै शिक्षकमाथि हातपात गरेकी लक्ष्मी साह, पूजा मण्डल र पँकज झालाई प्रहरीले पक्राउ गरेको थियो । केहिदिनपछि उनीहरुलाई तारेखमा रिहा गरिएको थियो । तारेखमा रिहा भएपनि मामिला चल्दै आएको थियो ।

बुधबार जिल्ला प्रहरी कार्यालय धनुषामा तीनै जनाले सार्वजनिक माफी मागेको हो । उनीहरुले स्कूलभित्र पसेर अशान्ती मच्चाउँदा विद्यालयको सरकारी सम्पति समेत तोडफोड भएको थियो । विद्यालय प्रशासनले तोडफोडको जिम्मेवार तीनै जनालाई ठहराउँदै क्षतिपूर्ति उनीहरुबाटै तिराउने अडान लिँदै आएको थियो । जिप्रका धनुषामा उनीहरुले केही क्षतिपूर्ति दिएपछि छाडिएको हो ।

जिल्ला प्रहरी कार्यालय धनुषाका अनुसार, सो घटनामा पक्राउ परेका तीनै जनाले सार्वजनिक माफी मागेको तथा दुई वटा कम्यूटरको सिपियू दिएपछि मुद्दा रफादफा गरिएको हो । यद्यपी, उनीहरुलाई सशर्त छाडिएको जनाउँदै यस्ता क्रियाकलापमा पुनः देखिए कडा कारवाही समेत गरिने भएको छ ।

अपरान्ह ४ बजेको जिल्ला प्रहरी कार्यालय धनुषामा विद्यालय प्रशासन र हिन्दु सम्राट सेना पक्षबीच सहमति भएको हो । हिन्दु सम्राट सेनाकी लक्ष्मी साह, पूजा मण्डल र पँकज झाले माफी मागेको हो ।

गत जेठ १४ गते विद्यालयमा पसेर शिक्षक अखिलेश झामाथि तीनै जनाले सुनुयोजित तरिकाले हातपात गरेका थिए । सो सन्दर्भमा विद्यालयमा प्रधानाध्यापक बलिराम साहले उनीहरु कतैबाट लेनदेन गरी गैर अभिभावक बनेर विद्यालय छिरेको आरोप लगाएका छन् ।