सिरहाको चमाविका प्राचार्य कर्ण भारतीय नागरिक !

न्यूज ब्यूरो, सिरहा । मधेश प्रदेशको सिरहा जिल्लास्थित एक माध्यमिक विद्यालयका प्राचार्य नै भारतीय नागरिक रहेको प्रमाण फेला परेको छ ।

सिरहाको सिरहा नगरपालिका सिरहास्थित रहेको चन्द्र उच्च माध्यमिक विद्यालयका प्रधानाध्यापक मधुसुदन कर्ण भारतीय नागरिक रहेको प्रमाण फेला परेको छ । आफू नेपाली नागरिक हुँ भनी सरकारी जागिर खाँदै आएका कर्ण भारतीय नागरिक समेत रहेको खुलेको छ ।

प्राचार्य कर्ण छिमेकी राष्ट्र भारतमा समेत मतदाता रहेको प्रमाण फेला परेपछि उनी भारतीय नागरिक रहेको खुलेको छ ।

भारतको बिहार राज्य मधुवनी जिल्लाको लदनीया थाना सिधधकाला गाउँ बस्ने कर्ण नेपाली नागरिकता लिएर सरकारी जागिर गर्दै आएका छन् । उनी सिरहाको चन्द्र उच्च माविमा प्रधानाध्यापक हुन् ।

नेपाली नागरिकता अनुसार कर्ण सिरहाको विष्णुपुरका हुन् । उनले २०४२ सालमै लिएको नागरिकतामा चन्द्रउदयपुर २ लेखिएको छ । जसमा बुवाको नाम तेजनारायण लाल कर्ण उल्लेख छ ।

२०२१ साल जन्ममिति रहेको कर्णको नेपाली नागरिकता बँशजको आधारमा प्रदान गरिएको देखिएको छ । जिल्ला प्रशासन कार्यालय सिरहाबाट उनले लिएको नागरिकता अनुसार पनि उनी प्रमिला देवी कर्णको श्रीमान हुन् ।

प्रमिला देवीको विस्तृत भारतको बिहार राज्यको मतदाता सूचिमा समेत देखिएको छ । प्रमिलाको पतिको नाममा मधुसुदन कर्णको नाम उल्लेख भएपछि उनी भारतीय नागरिक रहेको खुलेको छ । तेजनारायण लालकर्णलाई बुवा बनाएर कर्णले नेपाली नागरिकता लिएको आकलंन गरिएको छ ।