मतदाताले बिर्सेको भोँटर कार्ड पुरयाउन जाँदा जनमतका ४ कार्यकर्ता पक्राउ, प्रहरीमाथि शंका

न्यूज ब्यूरो, बारा । बारा निर्वाचन क्षेत्र नम्बर २ को एक मतदान स्थलबाट जनमत पार्टीका चार जना कार्यकर्तालाई प्रहरीले नियन्त्रणमा लिएको छ ।

बाराको देवताल गाउँपालिका वडा नं. २ कल्याणपुरस्थित मतदानस्थल बाहिर मतदाताले मतदाता परिचय पत्र (भोँटरकार्ड) घरमै बिर्सेपछि कार्ड पुरयाउन जाँदा उनीहरुलाई पक्राउ गरिएको जिल्ला प्रहरी कार्यालय बाराले जनाएको छ ।

जिल्ला प्रहरी कार्यालय बाराको अधिकारिक सँचारबाट प्राप्त जानकारी अनुसार ४ जनालाई नियन्त्रणमा लिइएको छ । उनीहरुले अरुको परिचय पुरयाउन गएको बेला पैसा बाँडने आरोप लगाएर विवाद भएपछि विवाद साम्य पार्न उनीहरुलाई नियन्त्रणमा लिएको हो ।

उनीहरुलाई तत्कालै नियन्त्रणमा राखेर अनुसन्धान गर्दा मतदाता परिचय भेटाएको जनाइएको छ । मतदाताले समेत आफू घरमै परिचय पत्र बिर्सेपछि ल्याउन भनिएको पुष्टि गरेको छ ।

परिचय पत्र नै पुरयाउन गएको बेला प्रहरीले पूर्वाग्रह तवरले पक्राउ गरेको भन्दै प्रहरीमाथि पनि शंका जाहेर गरिएको छ । जनमतका नेताहरुले प्रहरी पूर्ण रुपले जसपासँग मिलेको आरोप लगाएका छन् ।

यता, पक्राउ परेकाहरु महोत्तरी जिल्लाको रहेको बताइएको छ । महोत्तरीबाट कार्यकर्ता खटेका उनीहरुलाई चुनावको बिषयमा कुराकानी गरिरहँदा प्रहरी बोलाएर पक्राउ गर्न लगाएको आरोप छ । प्रहरीले उनीहरुको साथबाट भोँटर कार्ड बाहेक अन्य केही नभेटाएको जनाएको छ ।

पक्राउ परेकाहरुले मतदाता लोभाउन पैसा बाँडदै गरेको आरोप छ । उनीहरुको साथबाट २२ हजार रुपैयाँ भेटाएको कुरा समाजिक सँजालमा आएको सन्दर्भमा प्रहरीले पैसा नभेटाएको प्रतिक्रिया दिएका छन् ।

बाहिरको मान्छे भएर भोँटर कार्ड पुरयाउन जाँदा शंकाको आधारमा उनीहरुलाई पक्राउ गरिएको जनाइएको छ ।

केही बेर अगाडी जसपाका एक नेतालाई नक्कली भोँटसहित पक्राउ परेका हुन् । उनको साथबाट नक्कली मत फेला परेको पुष्टि प्रहरीले गरेको हो ।