समाचार लेखेको रीसविले पत्रकारमाथि तस्करले गरे दुरव्यवहार

न्यूज ब्यूरो, सिरहा । चोरी पैठारीको समाचार लेखेको भन्दै मोहन यादवको इसारामा म्याजिक साहु गिरिजा भन्नेले पत्रकारहरूलाई गालीगलौज गर्दै अभद्र व्यवहार गरेको छ ।

नव जगृति साप्ताहिकका पत्रकार बद्री नारायण यादव र मिथिला रत्न दैनिकका प्रकाशक सम्पादक तथा नेपाल पत्रकार महासंघ शाखा सिरहाका सचिव शिवदयाल यादवमाथि तस्करको समाचार लेखेको निहुँमा गालीगलौज गर्दै अभद्र व्यवहार गरेका छन् । ज १ ज ३१५ नम्बरको म्याजिक सिरहा चोहर्वा सडक भएर जानुको साटो छिन् छिनमा सहायक बाटो प्रयोग गर्दै मिर्चैया पुग्दा शंका लागेपछि प्रहरीले चेक गर्दै गरेको जानकारी पाएर पत्रकारहरू पुगेका थिए ।

तस्करीको समान ढुवानीमा बदनाम र चर्चामा आएको म्याजिक देखेपछि पत्रकारहरूले फोटो तथा भिडियो बनाउन थालेको प्रत्यक्षदर्शीहरूले बताए। उनीहरूका अनुसार त्यही क्रममा मोहन यादव भन्ने व्यापारी ४/५ जना युवा सहित चेक गर्ने स्थल पुगेर धम्कीपूर्ण भाषा प्रयोग गर्दै पत्रकारहरू गाडीको फोटो खिच्न र समाचार लेखेर काममा अवरोध गरेको भन्दै हात खुट्टा काटेर भएपनि तह लगाउनु पर्छ भन्ने धम्कि अभिव्यक्ति समेत दिए। 'तैंले नै म्याजिक रोकाउने र त्यसको समाचार लेख्ने काम गरेछस्। तलाई नै तह लगाउनु पर्छ, गिरिजाको भनाइलाई उदृत गर्दै बद्री नारायण यादवले भने, गिरिजाले गाली गर्दै हातपातको प्रयास गर्दा त्यसको फोटो खिच्न प्रयास गर्दा मोहनको इसारामा शिवदयाल यादव माथि गिरिजाले गाली गर्दै हातपात समेत गरे।'

भन्सार पेपर र सामानको परिमाण सही भएको भए बाइपास सडक प्रयोग किन ?, नेपाल पत्रकार महासंघ सिरहाका सचिव शिवदयाल यादवले दाबी गर्दै भने, अर्कै समय र फरक परिमाणको भन्सार पेपर बनाएर जाँचकर्मीलाई छल्न प्रयास भएको छ ।' कानुनले अमिल्दो पेपर बनाएर (मैदा) भित्र प्रतिबन्धित पदार्थ लुकाएको उनले दाबी गरे । यदि त्यस्तो केही थिएन र सामान्य वस्तु थियो भने धम्कीको भाषा प्रयोग र बाइपास सडकको प्रयोग किन ? उनको प्रश्न छ ।

सचिव यादवको अनुसार गिरिजा र मोहनको कारण आफ्नो मोबाइल फुटेको साथै अर्को मोबाइल घटना स्थलमै हराएका छन् । चेकजाँच स्थलमा मोहन र गिरिजा भाषा शैली र बल प्रयोगको कारण अवस्था तनावग्रस्त हुन लाग्दा पनि उपस्थित रहेका प्रहरीले सामान्य भन्दै जिम्मेवारीबाट विमुख भएकोले त्यस घटनाबारे विशेष छानबिन भई दोषीमाथि कारबाहीको माग पत्रकारद्वय गरेका छन् ।

दुई दिन अघि ३१५ नम्बरकै सोही म्याजिक १५ बोरा अवैध मैदा लोड गरिएको अवस्थामा प्रहरीले सिरहा नगरपालिका वडा नम्बर ९ स्थित गुलरिया नजिकबाट नियन्त्रणमा लिएको थियो । जसको समाचार पत्रकार बद्री नारायण यादव र शिवदयाल यादवले लेखेका थिए ।