यादवको पक्षमा देखिएनन लोसपाका नेतृत्वहरु, अन्तिम समयमा यादव पक्षलाई टेन्सन

न्यूज ब्यूरो, बारा । बारा जिल्लाको निर्वाचन क्षेत्र नं. २ को उपनिर्वाचनमा जसपा अध्यक्ष उपेन्द्र यादवको पक्षमा भनिएका लोसपा अध्यक्ष महन्थ ठाकुर पञ्छिएका छन्।

पाँच दलीय गठबन्धनमा लोसपा अध्यक्ष ठाकुर रहेपनि विहीबार गढीमाईमा आयोजित गठबन्धनको सभामा ठाकुर पुगेनन् । लोसपा अध्यक्ष महन्थ ठाकुर पनि सभालाई सम्बोधन गर्ने प्रचार गरिएको थियो। तर अन्तिम समयमा ठाकुरले अस्वीकार गरेका थिए ।

लोसपाका एक वरिष्ठ नेताका अनुसार पार्टी तथा विभिन्न संस्थाहरुले गरेको सर्वेक्षणमा उपेन्द्र यादवको हार निश्चित देखिन्छ । ‘ठाकुर जी त्यो सभामा गएर पनि उपेन्द्र यादव जित्ने सम्भावना रहँदैन।’ लोसपाका उक्त नेताले भने,‘बारा २ का स्थानीय नेता कार्यकर्ताहरुले सीके राउतले जित्ने भनेको छ।’

ठाकुर निटक श्रोतका अनुसार महन्थ ठाकुर जीवनको उतरार्धमा रहेकोले उनी विवादमा पर्न नचाहेको हो।

निर्वाचनअघि उपेन्द्र यादवले जसपाबाट महन्थ ठाकुर र राजेन्द्र महतो लगायतका नेताहरुलाई कारवाही गरेर निकालेको थियो। उपेन्द्र यादवको पार्टी विभाजन हुन लाग्दा तत्कालिन राजपाले एकीकरण गरी उपेन्द्र यादवलाई बचाएको थियो । तर, त्यसको केही दिनमै पार्टी कब्जा गरेर उपेन्द्र यादवले राजपाका नेताहरुलाई पार्टीबाट निकालेका थिए ।

पाँच दलिय गठबन्धनको साथ भनिएपनि लोसपाका उच्च नेतृत्वहरु नै चुनावी सभामा नगएपछि उपेन्द्र यादव पक्षधरलाई टेन्सन भएको हो । यद्यपी, लोसपाकै प्रदेश साँसद जीतेन्द्र सोनल लगायतका नेताहरु देखिएपनि अध्यक्ष तथा वरिष्ठ नेताहरु पन्छिएका छन् ।