सिरहाः गाउँमा गाई काटेको भन्दै तनाव, मासु बरामद, एक जना पक्राउ !

न्यूज ब्यूरो, सिरहा । मधेश प्रदेशको सिरहा जिल्लास्थित मुस्लिम समुदायका व्यक्तिहरुले गाई काटेको भन्दै बुधबारदेखि नै गाउँमा तनाव उत्पन्न भएको छ ।

सिरहाको कल्याणपुर नगरपालिका वडा नम्बर १० स्थित बसेको मुस्लिमहरुको नयाँ वस्तीमा गाई काटेको भन्दै हिन्दु समुदायका स्थानीयहरुले बुधबार बिहानैदेखि विरोध जनाउँदै आएको छ ।

दुई बर्ष अगाडी मात्र बसेको मुस्लिमहरुको नयाँ वस्तीमा नेपालको राष्ट्रिय जनावर एवम् हिन्दुहरुको पूजनीय मानिने गाई काटेको भन्दै दुई पक्षबीच तनाव उत्पन्न भएको हो ।

बुधबार विहान करिब ११ बजेको समयमा सो बस्तीमा गाईको मासु फेला परेको भनेर प्रहरीलाई जानकारी गराइएको थियो । गाई काटेको खवर सुने लगत्तै केही बेरमै सो वस्तीमा पुगेका जिल्ला प्रहरी कार्यालय सिरहाका प्रहरीलाई देखेपछि केही जना फरार भएका छन् ।

सोही बस्तीबाट २ किलो मासू बरामद भएको जिल्ला प्रहरी कार्यालय सिरहाले जनाएको छ । यद्यपी, सो मासु गाईकै रहेको वा नरहेको बारे पुष्टि अझै नभएको जनाइएको छ ।

जिल्ला प्रहरी कार्यालय सिरहाका प्रवक्ता डिएसपी शँकर चौधरीका अनुसार सो वस्तीमा धनुषाको जनकनन्दिनी गाउँपालिका वडा नं. २ बल्हागोठ बस्ने बर्ष ६३ को गरफुदिन शेखले मासु लिएर गएको प्रारम्भिक अनुसन्धानबाट खुलेको हो ।

शेखको साथबाट २ किलो मासू र ८० रुपैयाँ बरामद भएको डिएसपी चौधरीले जानकारी दिए । मासुलाई ल्याब टेष्टको लागि पठाउने तयारी भईरहेको पनि बताए । उनले आरोपितले समेत गाईकै मासु भएको भनेर सँकेत दिएको बताएपछि यथार्थ पुष्टि गर्न ल्याब पठाउने तयारी गरिएको बताए ।

गाईको मासु ठहरिएमा राष्ट्रिय जनावर काटेको आरोपमा उनलाई सोही बमोजिम सजाय हुने जनाइएको छ । यता, सोही वस्तीमा बस्ने जमसेद अन्सारीले गाईको मासूको विरोध गर्दा गालीगलौज गरेपछि उनलाई पनि प्रहरीले पक्राउ गरी नियन्त्रणमा लिएको छ । अहिले सो वस्तीमा तनाव उत्पन्न भएको छ ।