नुहाउँदै गरेकी किशोरीको अर्धनग्न भिडियो खिच्ने युवकलाई बचाउन खोज्ने नेताको पक्षमा जसपाको प्रदर्शन

न्यूज ब्यूरो, राजविराज । सप्तरीमा आफ्नै घरमा नुहाउँदै गरेकी एक किशोरीको अर्धनग्न भिडियो खिचेर समाजिक सँजालमा हाल्ने युवकलाई बचाउ गर्न गएका जसपाका नेताको पक्षमा प्रदर्शन गरिएको छ ।

जनता समाजवादी पार्टी (जसपा) नेपालका नेता कार्यकर्ताहरुले बुधबार साँझ जिल्ला प्रहरी कार्यालय सप्तरीको प्रहरी ईन्सपेक्टरलाई कारवाहीको माग गर्दै पनि प्रदर्शन गरेका हुन् ।

जसपाका जिल्ला अध्यक्ष केदार यादवलाई ईन्सपेक्टर नविन थापा मगरले जिल्ला प्रहरी कार्यालयभित्रै कुटपिट गरेपछि जसपाका नेता कार्यकर्ताहरुले विरोध जनाउँदै प्रहरीको विरुद्धमा प्रदर्शन गरेका छन् ।

कुटपिट गरेको प्रहरीलाई कारबाही गर्ने माग गर्दै जसपाले दुई दिनदेखि राजविराजमा प्रदर्शन गर्दै आएको छ । जसपा अध्यक्ष यादव दुई पक्षको विवाद मिलाउन प्रहरीसँगै छलफलमा बसेका थिए । सोही छलफलमा प्रहरीसँग विवाद भएको थियो ।

प्रहरी र नेताबीच धक्कामुक्की हुँदा नेता यादवको अनुहारमा डाम बसेको छ । उनीहरुले प्रहरी निरीक्षक थापालाई कारबाही गर्नुपर्ने माग गरेका छन् । तर सप्तरी प्रहरी प्रमुखले उनको संरक्षण गरेको जसपा नेताहरुको गुनासो छ । प्रहरी निरीक्षक थापा अहिले जिल्लामै कार्यरत छन् ।