हनुमान जयन्तीको पूर्व संध्यामा हनुमान मन्दिर तोडफोड

न्यूज ब्यूरो, जनकपुरधाम । भोली विहिबार मनाइने हनुमान जयन्तीको पूर्व संध्यामा बुधबार हनुमान मन्दिरमा तोडफोड गरिएको छ ।

जनकपुरधाम र महोत्तरीको सिमामै रहेको पिपरा गाउँपालिका वडा नं. ४ स्थित रहेको हनुमान मन्दिरमा सडक विभागले तोडफोड गरिदिएपछि केही बेर अवस्था तनावग्रस्त बनेको थियो ।

सो वडाका पूर्व वडाध्यक्षकै पालामा सडक विभागले मन्दिर सडक विस्तारको क्रममा अतिक्रमितमा परेको भन्दै हटाउनको लागि भनिएको बुझिएको छ । वर्तमान वडाध्यक्ष विदेही पासवानले आफूलाई सडक विभागले बोलाएर मन्दिर तोडफोड गरिदिएको बताएका छन् ।

चैत्त २३ गते भोली विहिबार हनुमान जयन्तीको अवसरमा हिन्दु धर्मावलम्बीहरुले भव्य पूजा र शोभायात्रा निकाल्ने तयारी गरेको बेला सडक विभागले हनुमानजीको मन्दिर तोडफोड गरेपछि स्थानीयहरु विरोधमा उत्रेका हुन् ।

स्थानीयहरुले विहानैदेखि जनकपुर–जलेश्वर सडकखण्डमा चक्का जाम गर्दै आएका थिए । गाउँपालिका अध्यक्ष रामजानकी यादवकै रोहबरमा मन्दिर तोडफोड गरिएको बताइएको छ ।

मन्दिरलाई व्यवस्थित गर्नुभन्दा पनि मन्दिरमा डोजर चलाएपछि स्थानीयहरु आक्रोसित बनेका छन् भने समाजिक सँजालमा समेत त्यसको विरोध गरिएको छ ।