स्ववियु निर्वाचनको विषयमा निर्णय नलिए आन्दोलनमा उत्रिने,  २४ घण्टे अल्टिमेटम

न्यूज ब्यूरो, सिरहा। मधेश प्रदेश स्थित सिरहा जिल्लाको गोलबजार नगरपालिकामा रहेको श्री रामप्रताप रामप्रसाद तामाङ्ग जनता क्याम्पसले स्ववियु निर्वाचनको सम्बन्धमा कुनै चासो नदेखाएको भन्दै विद्यार्थीहरूले २४ घण्टे अल्टिमेटम दिएको छ।

विभिन्न विद्यार्थी सङ्गठनहरूले आज एक प्रेस विज्ञप्ति जारी गर्दै भोलि मंगलबार बिहान ७ बजेभित्र निर्वाचनको विषयमा निर्णय नलिए आन्दोलनमा जान बाध्य हुने भन्दै संयुक्त विज्ञप्ति जारी गरेको हो।

अखिल क्रान्तिकारी, समाजवादी विद्यार्थी युनियन, नेवि संघ र विद्यार्थी जनमत संघले संयुक्त रुपमा विज्ञप्ति जारी गर्दै तत्काल स्ववियु निर्वाचन घोषणा नगरे क्याम्पस तालाबन्दी सहितको आन्दोलनमा उत्रिन विद्यार्थी बाध्य हुने उल्लेख गरिएको छ।

विज्ञप्तिमा भनिएको छ, ‘यो क्याम्पसले स्ववियुको गरिमालाई नै बदनाम गर्ने नियतले चुनावको घोषणा नगरेको प्रति हाम्रो गम्भिर ध्यानाकर्षण भएको छ। पटक पटकको ज्ञापनपत्र र विद्यार्थीको अनुरोधलाई बेवास्ता गरेको छ।’

यसअघि नै क्याम्पस प्रशासनले क्याम्पस सञ्चालक समिति र क्याम्पस प्रमुखको पनि समयावधि सकिएको यसको टुङ्गो नलाग्दा सम्म स्ववियु निर्वाचनको प्रकृया स्थगित गरेको सूचना जारी गरेको थियो।