जनकपुरः विरामीसँग बढी भाडा लिएका ६ जना एम्बुलेन्स चालकको नोकरी चट्ट

न्यूज ब्यूरो, जनकपुरधाम । जनकपुरधामबाट विभिन्न स्थानमा एम्बुलेन्स भाडा गरी अस्पताल जाने विरामीहरुसँग तोकेको शुल्कभन्दा अधिक भाडा लिने ६ जना चालकलाई बर्खास्त गरिएको छ ।

शनिबार सँयुक्त एम्बुलेन्स चालक सँघ (नेपाल) जिल्ला कार्य समिति धनुषाले अस्पतालसम्म विरामी लैजान तोकेको शुल्क भन्दा अधिक रकम लिएको पुष्टि भएपछि ६ जनालाई नोकरीबाट निकालिएको हो ।

जिल्ला कार्य समिति धनुषाका अध्यक्ष अरमान कुमार साहले जारी गरेको सूचिमा विरामीसँग अवैद्य रुपमा शूल्क उठाएका ६ जना चालकलाई बर्खास्त गरिएको हो ।

समितिले राजेश यादव, रामपति यादव, दिपेन्द्र प्रसाद शर्मा, अरुण कापर, विर्जु महतो, महेश दास र विमलेश चौधरीलाई बर्खास्त गरेको हो । उनीहरुले विरामीसँग अधिक भाडा लिएर अस्पताल पुरयाएका थिए ।

तोकेको मूल्यभन्दा अधिक लिएको खण्डमा समितिलाई जानकारी गराउन अनुरोध समेत गरिएको छ ।