नरहामा ७ दिने मोसा, मोबाईल, सटर ग्रील सम्बन्धी तालिम सुरु

न्यूज ब्यूरो, सिरहा । मधेश प्रदेशको सिरहा जिल्लास्थित नरहा गाउँपालिकामा ७ दिने मोबाईल, मोटरसाईकल, सटर ग्रील सम्बन्धी सीपमुलक तालिम सुरु भएको छ ।

आज (शुक्रबार, फागुन २६ गते) देखि सुरु भएको सो सीपमूलक तालिम आगामी चैत्त २ गतेसम्म चल्ने आयोजकले जनाएको छ ।

नरहा गाउँपालिका वडा नम्बर ३ को वडास्तरीय योजनामा धनुषास्थित त्रिनेत्र ट्रेनर्स नेटवर्क प्रा.लि. नामक गैर सरकारी सँस्थाको समन्वयमा ७ दिने तालिम सुरु भएको हो ।

शुक्रबार उदघाटन कार्यक्रम गरी तालिमको सुरुवात गरिएको हो । वडा नम्बर ३ बाट २१ जना औपचारिक रुपमा सहभागीता जनाएका छन् । उनीहरुलाई मोबाईल रिपेयरिँग, मोटरसाईकल रिपेयरिँग र सटर ग्रील बनाउने सम्बन्धी तालिम दिइने वडाध्यक्ष रुस्तम अन्सारीले जानकारी दिए ।

वडा नं. ३ की वडासदस्य सुनिता मण्डलको अध्यक्षता तथा वडाध्यक्ष अन्सारीको प्रमुख आतिथ्यमा सुरु भएको ७ दिने तालिममा मोबाईलको जानकारी, पार्टपूर्जाहरुको जानकारी, साधारण तवरले मोबाईल बनाउन सक्ने, मोटरसाईकल सर्भिसिँग, क्लीनअप, पार्टपूर्जा खोल्ने र सेटअप गर्ने तथा फलामे वस्तुको निर्माण सम्बन्धी आधारभूत तालिम दिइने जनाईएको छ ।

तालिममा वडा नं. ३ बाट विभिन्न वस्ती, समुदायबाट २१ जना सहभागीलाई छनौट गरिएको छ । ईच्छा र आर्थिक अवस्थालाई मध्यनगर गर्दै मुहसर समुदायलाई अधिक सँख्यामा सहभागी गराइएको त्रिनेत्र ट्रेनर्स नेटवर्क प्रा.लि.का कार्यक्रम सँयोजक सबिन यादवले बताए ।

उनका अनुसार, औपचारिक रुपमा तालिम ७ दिने भएपनि थप तालिम गर्न चाहने सहभागीहरुलाई निरन्तर चौहर्बामै तालिम दिइनेछ । उनीहरुले आफ्नो ईच्छा अनुसार तालिमलाई नियमित गर्न सक्ने बताए । त्यसको लागि चोहर्बास्थित रहेको सटर ग्रील, मोटरसाईकल र मोबाईल पसलमा निःशुल्क तालिम दिने सहमति गरेको बताए ।
उदघाटन कार्यक्रममा वडासदस्यहरु, समाजसेवी, पत्रकार, अनुसन्धानका मनोज दाससहित दुई दर्जन बढीको सहभागीता रहेको थियो ।