कमला पूल पुनः निर्माणको लागि माटो परीक्षण गर्न ग्राउडमा प्राविधिक टोली

न्यूज ब्यूरो, जनकपुरधाम । बहुप्रतिक्षित कमला नदीको पूल पुनः निर्माणको लागि प्राविधिक टोली कमला नदी पुगेका छन् ।

गत फागुन १५ गते नेपाल सरकारका भौतिक पूर्वाधार मन्त्री नारायणकाजी श्रेष्ठ कमला नदीमा बनेको पूल नीरिक्षण गर्दै पूल पुनः निर्माण कार्य दुई साताभित्रै सुरु हुने प्रतिवद्धता जनाए बमोजिम प्राविधिक टोलीले माटो परीक्षणको लागि कमला नदी पुगेका हुन् ।

सिरहाका पत्रकार देव कुमार यादवको विशेष पहलमा कमला नदीमा भाँसिएको पूलको पूनः निर्माणको लागि प्राविधिक टोली माटो परीक्षण सुरु गरेका छन् ।

धनुषा र सिरहालाई जोडने हुलाकी राजमार्ग अन्तर्गतको बहुप्रतिक्षित कमला पूल दुई बर्ष अगाडी बाढीमा सँचालन हुनु पूर्व नै भाँसिएपछि आवतजावत गर्न कठिनाई भएको हो ।

अस्थायी काठको पूल निर्माण गरी स्थानीयहरुले सो बाटो सुचारु राखेपनि पूल पार गर्न दैनिक ३० देखि ५० रुपैयाँसम्म तिर्नुपर्ने बाध्यता रहेको अवस्थामा पत्रकार यादवकै पहलमा कलर्भ निर्माण समेत सुरु भएको हो ।

तत्काल आवतजावत सहज बनाउनको लागि कलभर्ट निर्माण कार्य सुरु गरिएको हो । कमला नदीमा पानी चलायमान रहेको अवस्थामा चारचक्के सवारी आवतजावतको लागि समस्या भईरहेको अवस्थामा कलभर्ट निर्माण कार्य सुरु भएको हो ।

विहिबार मन्त्रालयले खटाएको प्राविधिक टोली कमला नदीको माटो परीक्षण सुरु गरेको हो । मन्त्री श्रेष्ठ कमलाको पूल निर्माणको लागि दुई साता समय भनेका थिए । उनले दुई साताभित्रै निर्माण प्रक्रिया सुरु गरिने बताएपछि प्राविधिक टोली समयमै आईपुगेका हुन् ।

प्राविधिक टोलीले माटो परीक्षणपछि कस्तो डिजाइन र मापदण्डको पूल बनाउने भनेर डिपिआर निर्माण गरी सरकारलाई बुझाउने छ । सोही डिपिआर बमोजिम कमला नदीमा मजबुत पूल बनाउने योजना रहेको छ ।

यसअघि बनेको पूल सँचालनमा आउनुभन्दा दुई दिन अगाडी नै भासिएको थियो । सो पूलको ३ वटा स्पान भासिएपछि आवतजावत बन्द भएको थियो ।