जनकपुरः प्रहरीको भ्यानबाट भागेका थुनुवा ७२ घण्टाभित्रै पक्राउ, ६ प्रहरी उपर अनुसन्धान सुरु

न्यूज ब्यूरो, जनकपुरधाम । धनुषा प्रहरीको भ्यानबाट भागेका थुनुवा ७२ घण्टाभित्रै पक्राउ परेका छन् ।

आइतबार साँझ जिल्ला अदालत धनुषाबाट म्याद थप गराई इलाका प्रहरी कार्यालय सबैला लगिरहेको बेला बलात्कार मुद्दाका आरोपी सबैला नगरपालिका १३ का २८ वर्षीय राजाबाबु मुखिया फरार भएका थिए ।

प्रहरीको गाडीबाट हाम फालेर भागेका मुखियालाई नेपाल भारतको सीमा क्षेत्रबाट पक्राउ गरेको प्रहरीले जनाएको छ । सीमावर्ती क्षेत्रमा लुकीछिपी बसिरहेको अवस्थामा प्रदेश प्रहरी कार्यालय र जिल्ला प्रहरी कार्यालयको संयुक्त टोलीले पक्राउ गरेको प्रहरीले बताएको हो ।

गएराती १२ बजेको समयमा जिल्ला प्रहरी धनुषा र मधेश प्रदेश प्रहरी कार्यालय जनकपुरबाट खटिएको संयुक्त टोलीले जबरजस्तीक करणी मुद्दाका थुनुवा मुखियालाई पक्राउ गर्न सफल भएको हो ।

मुखिया रातीमा बोर्डर क्रस गर्न लाग्दा पक्राउ परेका हुन् । उनलाई सीमावर्ती क्षेत्र जनकनन्दिनी गाउँपालिका वडा नम्बर १ ईनर्वा स्थित भारत तर्फ जानको लागि लुकी छुपी बसेको अवस्थामा पक्राउ गरिएको हो । उनको सुरक्षामा खटिएको ६ जना प्रहरी कर्मचारीहरू माथि प्रहरी नियमावली अनुसार आवश्यक कार्वाही प्रक्रिया अगाडी बढाईएको ।

गत आइतबार साँझ जनकपुरबाट फर्किँदै गर्दा थुनुवा मुखिया प्रहरीकै गाडीबाट कमला नहरमा हाम फालेर भागेका थिए ।