प्रहरीकै सेटिङ्गमा सिरहाको चोरहर्बामा अवैद्य ग्राभेल उत्खनन्, भू–क्षयको जोखिममा वस्ती

न्यूज ब्यूरो, सिरहा । सिरहा जिल्लास्थित प्रहरी र प्रशासनको मिलोमत्तो मै अवैद्य रुपमा ग्राभेल उत्खनन गरिरहेको पाइएको छ ।

गृह मन्त्रालयले नदीजन्य पदार्थको उत्खनन गर्न रोक लगाएपनि नदीजन्य वस्तु उत्खननको लागि स्थानीय प्रहरी र प्रशासनले हरियो झण्डी दिएपछि दिनरात उत्खनन जारी राखिएको छ ।

मापदण्डमा जिल्ला समन्वय समितिबाट पूर्व अनुमति, कानुनी अनुमति, कर बिजक समेत राख्नुपर्ने भएपनि लाखौँको ग्राभेल प्रहरीको मिलोमत्तोमा उत्खनन गरी ढुवानी गरिरहेको छ ।

नरहा गाउँपालिका वडा नम्बर ३ स्थित ठेकेदार दिपेन्द्र यादवले सिरहा प्रशासनलाई मिलाएर मापदण्ड विपरित ग्राभेल उत्खनन गरिरहेको पाइएको छ । यादवले बिना कुनै मापदण्ड पुरयाएर अवैद्य गिट्टी बालुवा उत्खनन जारी राखेको हो ।

चोहर्बाको ट््राफिक प्रहरीदेखि डयुटीमा रहेका नेपाल प्रहरीका प्रहरीले समेत निर्वाध रुपमा ग्राभेल उत्खनन गरी ढुवानी गर्न दिएपछि स्थानीयहरुले विरोध जनाएको हो । नदीजन्य वस्तु उत्खननले सँगै रहेको वस्तीमा बाढीको जोखिम, भूक्षय, वन विनाशको सम्भावना भएपनि यादवले बलपूर्वक अवैद्य रुपमा ग्राभेल उत्खनन गरी ढुवानीको साथै स्टोर समेत गर्ने गरेका छन् ।

क्रसर उद्योग समेत सँचालन गरेका दिपेन्द्र यादवले आफ्नै जमिन भन्दै उनले अवैद्य रुपमा फिटौँ गहिरोसम्म ग्राभेल उत्खनन गरिरहेको पाईएको छ ।

सो उत्खननको लागि जनता समाजवादी पार्टी (जसपा) नेपालका स्थानीय नेता कहलाउने राम दयाल यादवले पत्रकारहरुलाई समेत मिलाएर उत्खनन गरेको धाक लगाए । उनले सिरहाका पत्रकारहरुलाई समेत गोजीमा राखेर उत्खनन गरेको भन्दै कसैले केही गर्न नसक्ने धम्की समेत दिए ।

न्यूज ब्यूरोको जिज्ञासामा उनले आफूले सिरहाका पत्रकारलाई समेत आफ्नै गोजीमा रहेको धाक पनि लगाए ।

उत्खननको लागि प्रशासनबाट अनुमति लिनुपर्ने तथा हाल गृहमन्त्रालयले अवैद्य क्रसर उद्योग, नदिजन्य पदार्थको उत्खननमा प्रतिबन्ध लगाएपनि यादवद्धय मिलेर वन नदी दोहन गरिरहेका छन् ।

सो सन्दर्भमा प्र्रमुख जिल्ला अधिकारी सिडिओ भोजराज खतिवडाले जिल्ला प्रशासनबाट कुनै प्रकारको अनुमति नदिएको बताए । उनले प्रशासनबाट नदीजन्य वस्तु उत्खननको लागि कुनै अनुमति नदिएको दाबी गर्दै त्यस्तो भेटिए कारवाहीको प्रतिवद्धता समेत जनाए ।

जिल्ला समन्वय समितिका अध्यक्ष द्रोपति यादवले समेत जिल्ला समन्वय समिति सिरहाबाट नदीजन्य वस्तु उत्खननको लागि कुनै अनुमति नदिएको बताए । उनले अवैद्य रुपमा उत्खनन भइरहेको पाईए ट्रिपर पक्राउ गरी कारवाही गर्ने बताए ।

यता, ठेकेदारले आफूले जिल्ला प्रशासन कार्यालयबाट अनुमति पत्र लिएको बताए । उनले देखाएको अनुमति पत्रमा सडक निर्माणको लागि ढुवानीको लािग मात्र सहजता गरिदिन उल्लेख गरिएको छ । ढुवानीको लागि मात्र भनिएपनि सोही पत्रको आडमा गैर कानुनी रुपमा करिब १५ फिट गहिरोसम्म उत्खनन गरिरहेका छन् ।

ठेकेदार यादवले दैनिक एक दर्जन बढी ट्रिपरमा उत्खनन गरी ढुवानी गरिरहेका छन् । रातराती ट्रिपर लिएर उत्खनन जारी राखिएको स्थानीयहरुको भनाई छ । उत्खननको सबै भिडियोहरु सुरक्षित छन् ।