जनकपुरः प्रहरीको भ्यानबाटै थुनुवा फरार

न्यूज ब्यूरो, जनकपुरधाम । धनुषामा प्रहरीको हिरासत फोडेर ६ थुनुवा फरार भएको घटना नसेलाउँदै पुनः एक थुनुवा फरार भएको छ ।

धनुषाको ईलाका प्रहरी कार्यालय सबैलाको प्रहरी भ्यानबाटै थुनुवा फरार भएको हो । प्रहरीको नियन्त्रणमा रहेको बलात्कार मुद्दाका थुनुवा राजाबाबु मुखिया प्रहरीकै भ्यानबाट फरार भएका हुन् ।

जनकपुरधामस्थित जिल्ला अदालत धनुषामा म्याद थप गराई सबैलातर्फ फर्कने क्रममा सहीदनगर नगरपालिकाको वडा नम्बर ३ यदुकुहा बजारस्थितबाट फरार भएको प्रहरीले स्वीकारेको छ ।

जिल्ला प्रहरी कार्यालय धनुषाका प्रवक्ता तथा प्रहरी नायव उपरीक्षक वेदप्रसाद गौतमका अनुसार, प्रहरी भ्यानमै रहेका मुखियाले यदुकूहास्थितबाट भ्यानबाट हाम फालेर भागेको हो । धनुषाको सबैला नगरपालिका वडा नम्बर १३ किरतपुर बस्ने थुनुवा मुखिया प्रहरीको भ्यानबाटै भाग्नु शंकास्पद रहेको छ ।

फरार थुनुवाको खोजी कार्य तीव्र रूपमा भइरहेको बताउँदै प्रवक्ता गौतमले बताए। यसअघि ईलाका प्रहरी कार्यालय महेन्द्रनगरको हिरासतबाट ६ थुनुवा फरार भएको थियो जसमध्ये मात्र ४ जना पक्राउ परेका छन् भने अझै दुई जना फरार नै रहेको छ ।