जनकपुरः सिस्टम बिनाको सिडिओ अफिस, जहाँ कर्मचारीहरु गरिब अनपढलाई हप्तौ दिन्छन यातना

न्यूज ब्यूरो, जनकपुरधाम । जिल्ला प्रशासन कार्यालय धनुषामा कर्मचारीहरुको व्यवहारले आम सेवाग्राहीलाई हप्तौसम्म यातना दिने गरेको छ ।

नागरिकताको प्रतिलिपि वा नयाँ नागरिकताको लागि सिडिओ कार्यालय धनुषा पुग्ने सेवाग्राहीहरुले कर्मचारीबाटै यातनाको शिकार हुँदै आएको छ । सिडिओ कार्यालय धनुषाका कर्मचारीहरुले सेवाग्राहीहरुसँग जनावररुपी व्यवहार गर्दै आएको देखिएको छ ।

नागरिकताको प्रतिलिपीकै लागि सिडिओ कार्यालय जाने धनुषाका सेवाग्राहीहरुले एक प्रतिलिपिको लागि मात्र एक महिनासम्म अन्नपानी त्यागेर जानुपर्ने बाध्यता सिर्जना गरिदिएको छ । कर्मचारीहरुले बिना रुपैयाँको फाइल नै अगाडी नबढाउने प्रवृतिले गरिब, विपन्न, अनपढहरुले यातना भोग्नुपरेको छ ।

सम्बन्धित वडा कार्यालयबाट सिडिओ अफिसले माग गरेको सम्पूर्ण कागजातहरु लिएर गएपनि विभिन्न बहानामा सेवाग्राहीलाई यातना दिने गरेको छ । सम्पूर्ण कागजातहरु पेश गरेपनि नागरिकताको प्रतिलिपिकै लागि दिनभरि भोकै प्यास कार्यालय परिसरमा दिन काटदा अन्त्यमा भोली आउन भन्ने चलनले सेवाग्राही यातना भोग्नुपरेको छ ।

सम्बन्धित शाखा वा विभागका कर्मचारीहरुले फाईल नै लिन नमान्ने, अतिरिक्त रकम नदिए फाईल नै अगाडी नबढाउने, नचाहिको भएपनि जबरदस्ती सरजमिन लेखिदिने लगायतको गतिविधि सृजना गरी कृतिम यातना दिन थालेको हो ।

“नागकिताको फोटो बिग्रेको थियो । प्रतिलिपि लिन सिडिओ कार्यालय गए । मेरो रेकर्ड खोज्न ३०० रुपैयाँ लियो । त्यो भन्दा अघि ४ दिनसम्म रेकर्ड खोजिदिएन कर्मचारीले । एक जनाले पैसा दिएपछि खोजिदिन्छ भनेपछि ५०० मागेकोमा ३०० रुपैयाँ दिएपछि ५ मिनेटमै रेकर्ड खोजेर दियो । रेकर्ड सबै भेटियो । नागरिकता पनि छापियो । अनि लिने बेलामा भोली सरजमिन गर्नुपर्छ भनेर भनिदियो । सरजमिन गरेर दिए, तर पुनः ३ दिनदेखि हैरान भएर जति कराउँदा पनि चिठी नै लिन मानेनन कर्मचारीले । त्यो एउटा चिठी दिएर नागरिकताको प्रतिलिपि लिन मात्र ३ दिनदेखि सिडिओ कार्यालयमा आउँदै छु बस भाडा तिरेर भोकै । तर, अझै नागरिकताको प्रतिलिपि दिएन् । चिठी लिन भन्दा हेदै हेर्दैन, जो २०० वा ५०० दिन्छ उसको काम तुरुन्त हुन्छ ।”– धनुषा कमला नपा २ का सेवाग्राही बद्री ठाकुरले गुनासो पोखे ।

सिडिओ कार्यालयमा दिनभरि प्रतिलिपकै लागि लाइन लगाएर लिने बेलामा विभिन्न बहाना गर्ने गरिएको छ । तर, हातमै अतिरिक्त रकम दिएपछि काम भने १ मिनेटमै हुने गरेको धनुषाधाम नगरपालिका वडा नम्बर ५ का सेवाग्राही भगलु महतोले गुनासो पोखे ।

अति गरिव, विपन्न परिवारलाई १०० रुपैयाँ नै अति महँगो भएपनि उनीहरुले हप्तौसम्म ऋण काढेर नागरिकता बनाउन जनकपुर जाने गरेका छन् , तर कर्मचारीहरुले उनीहरुलाई यातना दिने गरेका छन् ।

नागरिकताको प्रतिलिपिको लागि सबै कागजात पूर्ण भए एक दिनमै दिने भएपनि हप्तौसम्म नागरिकताको लागि दौडाउने गरेको गुनासो सेवाग्राहीले गरेका छन् ।

धनुषाका तत्कालिन सिडिओ प्रदीपराज कणेल हुँदा सेवाग्राहीलाई सहज भएपनि अहिले पर्खर युवा सिडिओ भनिएका काशिराज दाहालले कर्मचारीको कु–प्रवृतिलाई रोक्न असक्षम देखिएका छन् ।