धनौजी गाउँपालिकामा अध्यक्षको बदमासी, करारका कम्प्यूटर अपरेटरलाई बनाए निमित्त हाकिम

न्यूज ब्यूरो, जनकपुरधाम । निरन्तर विवादमै रहँदै आएको धनुषाको धनौजी गाउँपालिकाका अध्यक्ष राजकुमार साहले आफूखुसी नियम कानुन मिचेर करारका कर्मचारीलाई निमित्त अधिकृतको जिम्मेवारी दिएको छ ।

धनौजी गाउँपालिकाका प्रमुख प्रशासकीय अधिकृत उपसचिव रामकिशोर महतो कार्यालय आउन छाडेपछि गाउँपालिका अध्यक्ष साहले एमआईएस अपरेटरमा कार्यरत करारका कर्मचारी विनोद मुखियालाई निमित्त प्रमुख प्रशासकीय अधिकृतको जिम्मेवारी दिएको हो ।

निमित्त अधिकृतको लागि मन्त्रालयबाट स्वीकृति हुनुपर्ने तथा नेपाल सरकारकै लोकसेवाका कर्मचारी हुनुपर्ने प्रावधा नभएपनि एक एमआईएस अपरेटरलाई निमित्त प्रमुखको जिम्मेवारी दिएको हो ।

निमित्त अधिकृतको लागि कार्यपालिकाको बैठकबाट समेत निर्णय गर्नुपर्ने नियम भएपनि सो नगरीकन अध्यक्ष साहले एकलौटी रुपमा उनलाई निमित्त बनाएर बिना कार्य सम्पन्नकै चेकहरु निकाल्न थालेको आरोप स्थानीयहरुले लगाएका छन् ।

गत आर्थिक बर्षमा काम गरेका उपभोक्ता समिति, ठेकेदारलाई अझै भुक्तानी नदिएको धनौजी गाउँपालिकाले अधिक कमिशन दिने ठेकेदारको चेक बन्द कार्यालयमा पनि काटिएको आरोप स्थानीयहरुले लगाएका छन् ।

आफ्नो व्यक्तिगत फाईदाको लागि सरकारको नियम, कानुनलाई धज्जिया उडाउँदै अध्यक्ष राजकुमार साहले एक कम्प्यूटर अपरेटरलाई निमित्त प्रमुख बनाएको हो । मुखियाभन्दा जेष्ठ र बरिष्ठ कर्मचारीहरु भएपनि उनीहरुलाई पन्छाएर मुखियालाई अधिकृतको जिम्मेवारी दिएको हो ।

पँजीकरण शाखामा कार्यरत अपरेटर मुखियालाई निमित्त प्रमुख प्रशासकीय अधिकृतको जिम्मेवारी तोकेर गैर–कानुनी कार्यहरु गर्न थालिएको हो । मुखियालाई योग्यता नै नपुगेपनि उनलाई अधिकृतको जिम्मेवारी दिएको हो ।

यस सन्दर्भमा गाउँपालिका उपाध्यक्ष र अध्यक्षलाई पटक पटक फोन गरेपनि उनीहरुले फोन भने उठाएनन् ।