मधेश प्रदेशसभाको सभामुखमा मण्डल निर्वाचित

न्यूज ब्यूरो, जनकपुरधाम । संघीय नेपालको मधेश प्रदेश सरकारको प्रदेशसभाको सभामुखमा एमाले पार्टीका रामचन्द्र मण्डल (मास्टरजी) निर्वाचित भएका छन् ।

मँगलबार दिउँसो भएको निर्वाचन प्रक्रियाबाट एमालेबाट लडेका रामचन्द्र मण्डल र काँग्रेसबाट लडेका जँगीलाल रायबीच प्रतिष्पर्धा भएको थियो । उनीहरु पुस ३० गते उम्मेदवारी दर्ता गराएका थिए ।

पूर्वमन्त्री समेत रहेका प्रदेशका भरत प्रसाद साहले पेश गरेको प्रस्तावमा जनता समाजवादी पार्टी (जसपा) का राम अशिष यादव, जनमत पार्टीका सँसदीय दलका नेता एवम् साँसद महेश प्रसाद यादव, एमालेका साँसद एवम् प्रदेशका मन्त्री सरोज कुमार यादव, साँसद रानी तिवारी, काँग्रेसका रामसरोज यादव लगायतकाहरुले विचार र मत राखेका थिए ।

काँग्रेको तर्फबाट जँगीलाल रायको लागि कुँवरकान्त झाले पेश गरेको प्रस्तावमाथि सँयुक्त रुपमा संक्षिप्त छलफल हुने र मतविभाजन प्रक्रियाबाट निर्णय हुँदा एमालेका रामचन्द्र मण्डलले ७४ मत प्राप्त गरे भने काँग्रेसका जँगीलाल रायले २९ मत प्राप्त गरे ।

मँगलबार सँसदमा उपस्थिति जनाएका १०३ साँसदहरुले मतदान गरेका थिए । सोमा भरत प्रसाद साहले गरेको रामचन्द्र मण्डल सभामुख प्रस्तावमा हुन्छमा ७४ जना र हुँदैनमा २९ मत परेको थियो । १०५ को बहुमत पाउन ५३ मत आवश्यक रहेकोमा ७४ मत प्राप्त गरी बहुमतले सभामुखमा निर्वाचित भएका छन् ।