जनकपुरः विद्यतु सर्ट भएर मुर्गा फार्ममा आगलगी, हजारौँ चल्लासहित मोटरसाईकल जलेर ध्वस्त

मुकेश पण्डित जनकपुरधाम । जनकपुरधामस्थित विद्युत सर्ट सर्किट भएर एक कुखुरा (मुर्गा) फारममा आगलगी हुँदा फार्म जलेर ध्वस्त भएको छ ।

धनुषा जिल्लाको धनौजी गाउँपालिका वडा नम्बर १ स्थित स्थानीय लक्ष्मी साहले सँचालन गर्दै आएको कुखुरा फार्ममा शनिबार विद्युत सर्ट भई भएको आगलगीमा मोटरसाईकल समेत जलेको छ ।

शनिबार बेलुकी करिब ५ बजे तर्फ विद्युतबाट सर्ट भई फार्ममा आगो लगेको थियो । समयमै आगो नियन्त्रण हुन नसक्दा हुर्काउन ल्याइएको हजारौँ चल्ला जलेर नष्ट भएको छ ।

आगलगीमा परी प्रदेश २–०२– ००२ प ५७१३ नम्बरको टिभिएस कम्पनीको एक मोटरसाईकल समेत जलेर नष्ट भएको छ।

आगलगीबाट कुनै प्रकारका मानवीय क्षति भएको छैन। आगलगीबाट करिब ७ लाख बराबरको क्षति भएको फार्म सँचालक लक्ष्मी साहले बताए ।