सिरहामा विपन्न परिवारलाई न्यानो सिरक

न्यूज ब्यूरो, सिरहा । वर्तमान शितलहर र चिसोलाई मध्यनजर गर्दै सिरहामा विपन्न परिवारलाई न्यानो सिरक वितरण गरिएको छ ।

शनिबार सिरहा जिल्लाको विभिन्न स्थानमा गरिब, विपन्न, निमुखालाई सिरहा प्रशासनले न्यानो सिरक वितरण गरेको हो ।

विपद व्यवस्थापन समिति सिरहाले आज विभिन्न स्थानमा विपन्नहरुको नाम छनौट अनुसार न्यानो सिरक वितरण गरेको हो । जिल्लाभरिमा शनिबार मात्र १ सय ५ जनालाई सिरक वितरण गरिएको हो ।

विपद व्यवस्थापन समितिको तर्फबाट सिरहाका सहायक प्रमुख जिल्ला अधिकारी आनन्द पौडेलको विशेष उपस्थितिमा निमुखा, विपन्नहरुलाई न्यानो सिरक वितरण गरेको हो ।

जाडोबाट बृद्धवृद्धालाई बचाउन, बालबालिकालाई बचाउनको विपद व्यवस्थापन समितिले न्यानो सिरक वितरण सुरु गरेको सिरहाका प्रहरी प्रवक्ता डिएसपी सुभाष बुढाथोकीले जानकारी दिए ।

उनका अनुसार, जिल्लाको ईलाका प्रहरी कार्यालय लहान, प्रहरी कार्यालय ठाडी, प्रहरी कार्यालय जानकीनगर, प्रहरी कार्यालय महेशवारीलगायत अन्य प्रहरीचौकीमै त्यस्ता लक्षित वर्गलाई बोलाएर सिरक प्रदान गरिएको थियो ।