सिरहा मिर्चैयामा प्रहरीले चलायो गोली , ७ प्रहरी घाईते, अवस्था तनावग्रस्त !

न्यूज ब्यूरो, सिरहा । विद्यार्थीलाई स्प्रीट खुवाएर मारेको भन्दै सिरहाको मिर्चैयामा विद्यार्थीहरुले गरेको आन्दोलनको क्रममा प्रहरीले गोली चलाएको छ ।

सिरहाको मिर्चैया नगरपालिका वडा नम्बर ६ स्थित रहेको सागरमाथा बोर्डिँग स्कूलमा शुक्रबार एक किशोरीलाई स्प्रीट खुवाएर मारेको भन्दै विद्यार्थीहरुले विहानैदेखि आन्दोलन गरेको थियो ।

सो आन्दोलनको क्रममा विद्यालयमाथि ढुँगामुढा गरेपछि अवस्था तनावग्रस्त बनेको थियो । विद्यालयको सिसाको झयालहरु फुटाएर क्षति पुरयाएको छ ।

सिरहा नगरपालिका वडा नम्बर ११ भलुवाही बस्ने धर्मेन्द्र महराकी १५ बर्षिय छोरी सिर्जना महरालाई सोही विद्यालयकी शिक्षिका अम्बिका लम्सालले औषधी दिँदै पानीको सट्टा स्प्रीट खुवाउँदा उनको मृत्यू भएपछि अवस्था तनावग्रस्त भएको हो ।

ईलाका प्रहरी कार्यालय मिर्चैयाको टोलीमाथि पथराव र कार्यालय अगाडी रोकिराखिएको प्रहरी भ्यानमा समेत ढुँगामुढा गरेपछि प्रहरीले अवस्था नियन्त्रणमा लिन ६ राउण्ड गोली प्रहार गरेको प्रहरी प्रवक्ता डिएसपी सुभाष बुढाथोकीले जानकारी दिए ।

उनका अनुसार, अवस्था नियन्त्रण गर्नको लागि ६ राउण्ड हवाई फायर र ३ राउण्ड आश्रुग्यासँ प्रहार गरेको बताए । उनका अनुसार, सो घटनामा ७ जना प्रहरी समेत घाईते भएका छन् । उनीहरुको उपचार स्थानीय स्तरमा भईरहेको छ ।

अहिले केही बेर अगाडी मात्र अवस्था निन्त्रणमा लिँदै मृतक किशोरीको शवलाई पोष्टमार्टमको लागि सिरहा पठाएको छ भने अभिभावक पक्ष र विद्यालय पक्षबीच छलफल जारी रहेको छ ।

यता, डा. सिके राउत नेतृत्वको जनमत पार्टी निकट विद्यार्थी जनमत सँघले कारवाहीको लागि आन्दोलन आह्वान गर्दै मिर्चैया तताएको थियो ।