मधेशमा मुख्यमन्त्री बनाउनको लागि ६ दिनको समय, कसको हुन्छ मुख्यमन्त्री ?

न्यूज ब्यूरो, जनकपुरधाम । मधेश प्रदेशमा आगामी कार्यकालको लागि बन्ने मुख्यमन्त्रीको लागि प्रदेश प्रमुखले पत्र काटेको छ ।

मधेश प्रदेशका प्रदेश प्रमुख हरिशँकर मिश्रले संविधानको धारा १६८ को उपधारा १ बमोजिम प्रदेश सरकारको मुख्यमन्त्री चयन गर्नको लागि बहुमत नरहेको स्पष्ट पारेको छ ।

आगामी विहिबार पुस २८ गतेसम्मको समय दिँदै प्रदेश प्रमुख मिश्रले मधेश प्रदेशमा कुनै पनि दलको स्पष्ट बहुमत नरहेकोले मिश्रित सरकार समेत बनाउन आह्वान गरेको हो । उनले धारा १६८ को उपधारा २ बमोजिम दुई वा दुईभन्दा बढी दलहरु मिलेर बहुमतको आधारमा मुख्यमन्त्री चयनको लागि विहिबार साँझ ४ बजेसम्मको लागि आह्वान गरेको हो ।

मुख्यमन्त्रीको लागि दाबी पेश गर्न आगामी पुस २८ गते साँझ ४ बजेसम्मको मात्र समय दिएको हो । यस समयभित्र दुई वा दुईभन्दा बढी दलहरु मिलेर सरकार बनाउनुपर्ने छ ।

मधेश प्रदेशमा एमाले, माओवादी, जसपा र जनमत पार्टी मिले सरकार बन्नेछ । समानुपातिकसहित एमालेसँग २३, जसपासँग १६, जनमत पार्टीसँग १३ र माओवादीसँग ८ सिट छ ।

१०७ सदस्यीय प्रदेशसभामा यी चारको सिट संख्या ६० पुग्नेछ । सरकार बनाउन ५४ सिट आवश्यक पर्छ ।