मेयर, उपमेयर र अधिकृतबीच त्रिपक्षिय टशनले धनुषाको कमला नगरपालिका ध्वस्त

न्यूज ब्यूरो, जनकपुरधाम । निरन्तर विवादमै रहँदै आएको धनुषाको कमला नगरपालिकामा जनप्रतिनीधि र अधिकृतबीचको त्रिपक्षित टशनले कमला नगरपालिका ध्वस्त भएको छ ।

यसअघि मेयर र उपमेयरको झगडाले परेशान रहेको कमला नगरपालिका अहिले मेयर उपमेयरसहित पालिकाको प्रमुख प्रशासकीय अधिकृतबीचको टशनले नगरपालिका ध्वस्त बनेको छ ।

नेपाली काँग्रेसबाट निर्वाचित उपमेयर शिला देवी मण्डल जनता समाजवादी पार्टी (जसपा) नेपालको प्रयोगमा आउँदा नगरपालिकालाई अपाँग बनाएको थियो । जसपाका पूर्व जनप्रतिनीधिहरुले उपमेयरलाई आफ्नै पार्टीको मेयर र अन्य जनप्रतिनीधि विरुद्ध उक्साउँदा उक्साहटमा परेकी उपमेयरले नगरपालिकालाई सकेसम्म ध्वस्त पारिन् ।

यता, नेपाली काँग्रेस पार्टीबाटै निर्वाचित भएका मेयर विशेश्वर प्रसाद यादव र पालिकाको कार्यालय प्रमुख सुबोध कुमार ठाकुरबीचको आन्तरिक टशनले बैशाखीमा चलिरहेको नगरपालिका पूर्णरुपले ध्वस्त भएको छ ।

आम सर्वसाधारणबीच अधिकृत ठाकुर र मेयर यादवबीचको प्रशासनीक सम्बन्ध राम्रो मानिएपनि आन्तरिक रुपमा दुवै जनाबीच टशन चलिरहेको छ । अधिकृत र उपमेयर एक पक्षमा भएपछि मेयर एक्लै अर्को पक्षमा उभिदाँ नगरपालिका ध्वस्त भएको छ ।

गत बैशाख ३० गते भएको स्थानीय तहको चुनावपछि चुनिएको नयाँ जनप्रतिनीधिहरुले पुरानो बजेटको सँचालन र सँचालन खर्चको बारेमा विवाद चलाए भने पुरानो (पराजित) जनप्रतिनीधिहरुले अधिकृत ठाकुरबाट राजीनामापछि पनि पाएको सेवा सुविधाले नगरपालिकामा टशन चलेको छ ।

पुरानो केही जनप्रतिनीधिहरुले टेबुलमुनीको रकमको लागि मैदानमा उत्रेका छन् भने नयाँ जनप्रतिनीधिहरुले पनि सोही रकमको लागि टशन गरिरहेको अवस्थाले नगरपालिकालाई ध्वस्त बनाएको छ ।

पुरानो एवम् पूर्व जनप्रतिनीधिहरुले बैशाखसम्म चलाएको बजेटको हरहिसाब नहुनुपर्ने पक्षमा रहेर उपमेयर शिला देवी मण्डललाई यूज गरिरहेका छन् भने नयाँ चुनिएका जनप्रतिनीधिहरु अधिकृत ठाकुरप्रति असन्तुष्ट छन् ।

अधिकृत ठाकुरले राजीनामा ठोकेपछि पनि पूर्व जनप्रतिनीधिहरुलाई ईन्धनसहित अन्य बजेट चलाएर सघाएको आरोप र शँकाले त्रिपक्षित भिडन्त भएको छ । अधिकृत ठाकुरको पूर्व जनप्रतिनीधिसँगको सम्बन्धले पनि उनलाई अविश्वासको खाल्डोमा धकेलिएको हो ।

हिसाब पारदर्शीताले बाँधिएको नगरपालिकाः

कमला नगरपालिकाकी उपमेयर शिला देवी मण्डलले नगरसभाको बेला विभिन्न माग उठाएर अदालतमा मुद्दा दर्ता गराएपछि सुरु भएको विवाद अझै साम्य भएको छैन । त्यतिबेला मेयर र अधिकृत मिलेर नगरसभा पास गरेपनि योजनाहरु सूचिकृत गर्न सकेनन् । उपमेयरको मुद्दाले लथालिँग भएको नगरपालिकामा मेयरले बाहिरी गेम खेलेपछि नगरपालिका झन जलिट अवस्थामा पुग्यो ।

वर्तमान मेयरलाई असफल बनाउने दाउमा रहेकी उपमेयर शिलादेवी मण्डलले दाउ नसप्रेपछि अन्ततः उनी आफ्नै पार्टीको मेयरको शरणमा पुगिन् । केही पूर्व जनप्रतिनीधिले विभिन्न प्रलोभनमा पारी उपमेयरलाई मेयर विरुद्ध उक्साएर नगरपालिकालाई बन्दी बनाउँदै मेयरलाई असफल पार्ने दाउ रचे । यद्यपी, सोही दाउमा मेयर परे पनि ।

आफ्नो कार्यकाललाई सुलभ र सहज रुपले नगरपालिका सँचालन गर्न सक्ने क्राईटेरियाबाट हारेका मेयर यादवले व्यक्तिगत ईगो बनाउँदै नगरपालिकालाई थप बन्दी बनाएर पछुतो समेत गरे । मेयर यादवलाई असफल बनाउने प्रतिपक्षिको रणनीति सफलता तर्फ लाग्न थालेपछि मेयरले बाहिरी गेम परिवर्तन गर्दै जडालाई उखाल्ने प्रयासमा लागेपछि नगरपालिका ध्वस्त बनेको छ ।

हरहिसाब पारदर्शीको लागि स्थानीयसहित केही वडाध्यक्षले अडान लिएपछि नगरपालिका झन विवादमा फँस्दै गयो । अधिकृत सुबोध कुमार ठाकुरमाथि पूर्व जनप्रतिनीधिलाई लाखौँको ईन्धन बाँडेको, कामै नगरी योजनाको भुक्तानी गरेको जस्ता आरोपले घेरिएपछि पुनः त्रिपक्षिय तनाव भयो ।

हरहिसाब प्रत्येक नागरिकको हक भएको भन्दै जनप्रतिनीधिसहित सर्वसाधारणहरुले समेत हिसाबको माग उठाएपछि अन्ततः अधिकृत ठाकुर हिसाबकिताब गर्न सहमत भए र हिसाब मेयर विशेश्वर प्रसाद यादवलाई बुझाए ।

हिसाबको राजनीतिः

हरहिसाबको लागि अधिक चाप बढेपछि हिसाब दिन तयार भएका अधिकृत सुबोध कुमार ठाकुरले हिसाबकिताब गर्ने समय मिलाए । गत पुस ६ गते जनप्रतिनीधिहरुकै समायानुसार हिसाब पारदर्शी गर्ने समय बनेपछि सो दिन मेयर उपमेयर गायब भए । हरहिसाब लिएर तयार रहेका अधिकृत ठाकुरले मेयर उपमेयर नै नआएको भन्दै बहानाबाजी गर्दै हिसाब नदिएको आरोप खेपे ।

अधिकृत ठाकुरले मागिएको हरहिसाब आफ्नो हाकिमलाई बुझाएको प्रतिक्रिया दिए । उनले आफ्नो हाकिम मेयर रहेको भन्दै आफ्नो हाकिमलाई हरहिसाब सुम्पिएको दाबी गरे । एक स्थानीय तहको नगर प्रमुख नै सर्वोपरी हुने भएकोले हरहिसाब कहाँ पारदर्शी गर्ने अधिकार उनमै निहित भएको भन्दै अधिकृतले हिसाबको जिम्मेवारी मेयरमाथि थुपारे ।

हिसाबको लागि रोकिएको नगरपालिकाका केही वडाध्यक्षहरुले भने अझै मेयरसँग हिसाब माग्न गएका छैनन् । अधिकृतलाई मात्र लक्षित गर्दा मेयरको जिम्मेवारीलाई बिर्सेर झन समस्या उत्पन्न भएको छ । आफ्ना मातहतका जनप्रतिनीधिलाई सन्तुष्ट पार्ने कर्तव्य मेयरको हो । मेयरले हाकिमबाट हिसाब बुझेपछि असन्तुष्ट जनप्रतिनीधि र नागरिकलाई सन्तुष्ट पार्ने अवस्थामा विगत एक महिनादेखि अघोषित विदामा बसेपछि नगरपालिका ध्वस्त भएको छ ।

शिक्षकहरुलाई पुस १५ गतेभित्र नै तलब खुवाउने प्रतिवद्धता जाहेर गरेका मेयर, उपमेयर र अधिकृतले प्रतिवद्धता पुरा गर्न सकेनन् । यद्यपी, राजनीतिसँग प्रत्यक्ष आबद्धता लिएका शिक्षकहरुले समेत उक्साहट र मौसमी आन्दोलन गरेपनि अल्टिमेटम सकिँदा अन्य आन्दोलनको घोषणा गरेर पनि चुप बसेका छन् ।

उपमेयर र अधिकृतको एक कित्ता र मेयरको बेग्लै कित्ताकाटले तीनैबीचको झगडालाई प्रतिपक्षिले मात्र नभई अन्य राजनीतिक पार्टीका वर्तमान जनप्रतिनीधिले समेत भरपुर फाईदा उठाउन थालेका छन् । उनीहरुले नै रचेको जालोमा तीनैलाई फँसाएर पार्टीगत फाईदा लिने दाउ लगभग सफल भईरहेको देखिएको छ । कमलामा काँग्रेस पार्टीको गढ मानिन्छ, तर मेयरको असफलताले पार्टीको अवस्था समेत डगमडोल बनेको छ ।

त्रिपक्षिय टशनले कमला नगरपालिकामा माओवादी, जसपा, एमाले लगायतले प्रतिपक्षिको भूमिका पूर्ण निर्वाह गर्न सफल भएका छन् भने मेयर उपमेयर आफ्नै पार्टीको लगावमा असफल भएका छन् ।

टिप्पणीः अधिकृत सुबोध कुमार ठाकुरले बिना हिचकिचाहट आम नागरिकसमक्ष हरहिसाब पारदर्शी गर्न सक्नुपर्छ । मेयरलाई दिएको हिसाबको बारेमा मेयरलाई समेत सम्मलित गरी हिसाब पारदर्शी गर्नुपर्छ । हिसाब पारदर्शीताकै लागि ध्वस्त भएको नगरपालिकालाई सुचारु गर्न ५ दिनभित्रै हिसाब पारदर्शी गर्नुपर्छ । मेयरले समेत अधिकृत ठाकुरलाई आफ्नो अनुपस्थितिमा हिसाब पारदर्शीताको लागि आदेश गर्नुपर्छ । वा कसैलाई जिम्मा लगाएर भएपनि हिसाब ५ दिनभित्रै पारदर्शी गरी यथाशिघ्र नगरपालिका सँचालन गर्नुपर्छ ।