विदेहका मेयर दासले पत्रकार महतोलाई दिए छातीको हाड भाँच्ने धम्की

न्यूज ब्यूरो, जनकपुरधाम । धनुषाको विदेह नगरपालिकाका प्रमुख बेचन दासले पत्रकार शैलेन्द्र महतोलाई छातीको हाड भाँचिदिने धम्की दिएको आरोप लगाइएको छ ।

पुस १५ गते जनकपुरधाम उपमहानगरपालिका वडा नम्बर १२ स्थित मधेश प्रदेशसभा भवनमा नवनिवार्चित प्रदेशसभा सदस्यहरुको पद तथा गोपनियताको सपथ कार्यक्रममा पत्रकार महतोलाई विदेह नगर प्रमुख बेचन दासले ज्यान मार्ने धम्की दिएको पत्रकार महतोले बताए ।

प्रदेशसभा भवनमा रिपोर्टिङकै क्रममा रहेको पत्रकार महतोलाई प्रदेशसभाको परिसरमै नगर प्रमुख बेचन दासले लात्तीले छातीमा हिर्काएर हाड भाँचिदिने धम्की दिएको पत्रकार महतोले आरोप लगाए ।

मेयर दासले आफना विरुद्ध सामाचार लेख्ने एक जना पत्रकारलाई विगतमा समेत लात्तीले छातिमा हानेर हाड भाँचि दिएको र अझै पनि ५÷६ जना बाँकी रहेको जस्ता धम्कीपूर्ण भाषाशैली प्रयोग गरेको पत्रकार महतोको आरोप छ ।

“५,६ जनाको लिष्टमध्ये शैलेन्द्र महतोको नाम फस्टमै छ । आउनु होला नगरपालिका तिर लात्तीले हिर्काएर छातीको हाड भाँचिदिन्छु । मैले भाँचिन भने महिला लगाएर वा अन्य कसैलाई लगाएर भाँच्छु । तपाईंलाई छाड्दिन । म अपराध र जेलनेल भोगेर नै यहाँसम्म आएको हुँ । एक दुईपटक अझै जेल जानु पर्छ भने जाउँला । तर तपाईंलाई छाड्दिन ।’ भन्ने भाषाशैली प्रयोग गरेको पत्रकार महतोले भने ।

यता, विदेह नगरपालिकाका मेयर बेचन दासले धाकधम्की नदिएको बताएका छन् । उनले आवेगमा कडा स्वरमा बोलेपनि ज्यान मार्ने धाकधम्की नदिएको बताए । उनले आफू आवेगमा बोलेको स्वीकारे ।

न्यूज ब्यूरोको जिज्ञासामा मेयर दासले आफूले असल पत्रकारलाई सम्मान गर्ने गरेको बताउँदै पत्रकारको नाममा तथानाम लेख्ने, धाक धम्की दिनेहरुलाई सोही अनुसार व्यवहार गर्ने मात्र भनेको बताए ।

एकजना पत्रकारलाई केही दिन अगाडी कुटपिट गरेको सन्दर्भमा उनले आफूले नभएर समर्थकहरुले कुटेको स्वीकारे । उनले भने, –“अस्ती आएको मान्छे पत्रकार होईन, त्यस्ता कही पत्रकार हुन्छ त ? मसँग समय छैन भने नाई भनिदिन्छु की बैठकको बीच पसेर ईन्टरभीउ दिनैपर्छ भनेर हुन्छ । अस्ती आएको मान्छे पत्रकार होईन, कसैले पठाएर जबरदस्ती गर्न आएको थियो । कामकाज प्रभावित गरेपछि सेवाग्राहीहरुले नै कुटयो उसलाई ।”

उनले आफू सँचारकर्मीलाई सधैँ ईज्जत गर्ने गरेको बताए । उनले भने, –“मसँग सम्बन्धित समाचार छ भने मलाई सोध्नुपर्यो नी, म अधिकारिक व्यक्ति हुँ भने मेरो पनि प्रतिक्रिया लिनुपर्यो नी । कि एकतर्फा रुपले आफूखुसी जे मन लाग्यो लेखेर मानहानी गरिदिने छुट कसैलाई छैन् । म गलती गर्छु भने समाचार लेख्नुस तपाईहरु तर, मेरो पनि भनाई राख्नुस् ।”

उनले अस्ती पत्रकारको नाममा एक जनाले बितण्डा मच्चाएपछि सेवाग्राहीले कुटेको उदाहरण मात्र दिएको बताए । उनले अन्य कुनै पत्रकारलाई ज्यान मार्ने धम्की नदिएको बताए ।

यसैविच, प्रेस सेन्टर नेपाल मधेश प्रदेशका अध्यक्ष किरण कर्णले प्रेस स्वतन्त्रतालाई कुण्ठित गर्ने गरि नगर प्रमुखले पत्रकारलाई दिएको धम्कीप्रति खेद व्यक्त गरिएको छ । प्रेस सेन्टरको प्रेस विज्ञप्तिमा पत्रकारलाई धम्की दिने नगर प्रमुखलाई कारवार्ही गर्न माग गरिएको छ ।